З людзей выбраны і для людзей прызначаны…

Парафіяльныя аб'явы Карысныя спасылкі Літургічны каляндар Катэхеза Кантакты Відэаматэрыялы

З людзей выбраны і для людзей прызначаны…

17 мая 35-ую гадавіну з дня прыняцця прэзбітэрскага пасвячэння адзначае ксёндз пралат Крыштаф Мянкіна, які 29 гадоў свайго пастырскага служэння аддаў Беларусі, 19 з іх быў пробашчам нашай парафіі. Нарадзіўся ў горадзе Жабна Кракаўскага ваяводства ў Польшчы. Прайшоўшы фармацыю ад міністранта да кантара ў роднай парафіі ў касцёле Святога Духа, паступіў у Чэнстахоўскую вышэйшую духоўную семінарыю.

Святарскае пасвячэнне атрымаў 17 мая 1987 года ў катэдральным саборы. Пасля 3 гады працаваў у парафіях Чэнстахоўскай дыяцэзіі.

Яшчэ з часоў вучобы ў семінарыі, марыў быць месіянерам, каб несці Хрыста тым, хто не мае магчымасці скарыстацца паслугамі святароў. Мара ажыццявілася 26 жніўня 1990 года ў дзень Маці Божай Чэнстахоўскай, калі па запрашэнні біскупа Тадэвуша Кандрусевіча быў накіраваны на працу на Браслаўшчыну.

Першапачаткова абслугоўваў чатыры касцёлы: у Опсе, Пеліканах, Далёкіх і Дрысвятах, дзе 40 гадоў не было святара. Акрамя душпастырскай дзейнасці шмат намаганняў малады святар накіраваў на аднаўленне святынь, якія ў часы атэізму былі прыведзены ў заняпад. Займаўся таксама будаўніцтвам касцёла ў вёсцы Пагошча.

17 кастрычніка 2000 года ксёндз Крыштаф Мянкіна быў прызначаны пробашчам Мёрскай парафіі і дэканам новаўтворанага Мёрскага дэканата, да якога на той час належыла 9 парафій з Мёрскага, Шаркаўшчынскага і Браслаўскага раёнаў. Святыя Імшы цэлебраваў таксама ў Дзісне, Завуцці і Лявонпалі, пазней, пасля правядзення рамонту, — у капліцы ў Пераброддзі.

Пасля прызначэння на новае месца, святар адразу распачаў актыўную дзейнасць у розных накірунках. Значная работа была праведзена па падрыхтоўцы да святкавання 100-годдзя касцёла. Быў перакрыты дах, устаноўлена новая каменная агароджа і добраўпарадкавана прыкасцельная тэрыторыя. У святыні былі заменены вокны, пафарбаваны сцены, перакладзена плітка на падлозе, зроблены новыя лаўкі.

Пасля юбілею работы не спыніліся, а наадварот, быў рэалізаваны новы цікавы праект. У пачатку 2015 года на вокнах прэзбітэрыя з’явіліся вітражы з выявамі таямніц другой часткі Ружанца – таямніцамі святла, аўтарам якіх стаў віцебскі мастак Азат Тарасян. Першы вітраж спансіраваў сам пробашч парафіі ксёндз Крыштаф Мянкіна. На другі сродкі сабралі парафіяне, якія належылі да колаў жывога Ружанца.

Восенню таго ж года ў святыні з’явіўся чарговы – трэці – вітраж у гонар галоўнага тытула касцёла Унебаўзяцця Найсвяцейшай Панны Марыі. Фундатарамі вітража сталі сям’я Дарожка і калектыў Мёрскай сярэдняй школы №3. Аўтар малюнка – мастак Уладзімір Кандрусевіч, выканаўца вітража – мастак Васіль Матусевіч. Для ксяндза Крыштафа ўстаноўка вітражоў справа была не новая, бо падчас яго працы ў Опсе віцебскі мастак Аляксандр Малахаў зрабіў у касцёле 8 вокнаў-вітражоў.

Па ініцыятыве ксяндза Крыштафа ў 2008 годзе на цвінтары нашага касцёла ўстанавілі фігуру Папы Яна Паўла ІІ. А ў 2017 годзе была вырашана і справа 18-ці гадовага тэрміну даўнасці: фігуру Маці Божай Ратавальніцы Тонучых размясцілі на наберажнай над возерам, так, як калісьці марыў зрабіць ксёндз Уладас Пятрайціс.

Дзе б не працаваў ксёндз Крыштаф, ён імкнуся папоўніць святыні рэліквіямі. Так, дзякуючы яго намаганням, у нашай парафіі з’явіліся рэліквіі св.Язафата Кунцэвіча, якія ў 2004 годзе перадаў былы арцыбіскуп Чэнстаховы Станіслаў Новак. А ў красавіку 2011 года з Рыма былі дастаўлены рэліквіі тады яшчэ благаслаўлёнага Яна Паўла ІІ (Вялікага) (кананізацыя адбылася 27.04.2014г. - заўв. аўт.). Рэліквіі па просьбе пробашча парафіі Крыштафа Мянкіны перадаў мітрапаліт Кракаўскі кардынал Станіслаў Дзівіш, былы асабісты сакратар Папы Яна Паўла ІІ.

Ксёндз Крыштаф шмат увагі надаваў музычнаму аздабленню літургіі. У 2002 годзе пад кіраўніцтвам арганісткі Анжэлы Кіпрушавай быў створаны парафіяльны хор “Fiat”, які вельмі хутка і дынамічна развіваўся. Творчы калектыў запрашалі на ўрачыстасці і святы ў іншыя парафіі. Хор ажыццявіў таксама некалькі гастрольных тураў за межы рэспублікі ў Літву, Польшчу, Чэхію, Германію, Францыю, Галандыю.

Надаючы значную ўвагу рэлігійнай фармацыі дзяцей і моладзі, ксёндз Крыштаф імкнуўся каб маладое пакаленне вучылася не толькі спазнаваць Бога, але і прымала актыўны ўдзел у жыцці касцёла. Арганізоўваў моладзевыя сустрэчы, падарожжы, канцэрты, батлейкі на Божае Нараджэнне, адпачынак у Польшчы. Па задуме арганісткі Анжэлы Кіпрушавай у 2002 годзе ў нашай парафіі на дыяцэзіяльным узроўні прайшоў першы калядны фестываль для моладзі “Зорка Бэтлеема”. Важнай старонкай парафіі былі таксама пілігрымкі ў Будслаў, Росіцу, а з 2009 года — у Браслаў.

Ксёндз Крыштаф клапаціўся і аб новых пакліканнях. З пад яго рукі выйшлі тры святары: Аляксандр Грыцкевіч, Валерый Марціноўскі і Уладзіслаў Шарковіч.

За шматгадовую адданую місійную працу ў 2008 годзе ксёндз Крыштаф Мянкіна атрымаў Папскі тытул пралата. 22 чэрвеня 2017 года яго праца на Беларусі завяршылася. Святар вярнуўся на радзіму ў Польшчу, але добрая памяць пра яго жыве і сёння.

Хочам выказаць шчырыя словы ўдзячнасці былому пробашчу, шаноўнаму ксяндзу Крыштафу, за тое, што ён адгукнуўся на голас Бога і ўжо 35 гадоў імкнецца весці вернікаў на сустрэчу з Панам. За яго добрае і адкрытае сэрца, за святарскую мудрасць і ўмелае кіраванне нашай парафіяй, за клопат аб святыні і духоўным узрастанні парафіянаў, за ўменне пачуць, падтрымаць, даць параду.

З нагоды 35-годдзя святарства жадаем ксяндзу Крыштафу моцнага здароўя, радасці, душэўнага супакою, аптымізму і шчодрых дароў Духа Святога. Няхай Маці Божа Чэнстахоўская заўсёды абараняе ад небяспекі і атуляе сваёй бязмернай любоўю.

Жанна Закрэўская, тэкст, фота ўласныя і з архіва парафіі