Адпустовая ўрачыстасць у Шаркаўшчыне

Парафіяльныя аб'явы Літургічны каляндар Катэхеза Кантакты Відэаматэрыялы

Адпустовая ўрачыстасць у Шаркаўшчыне

14 верасня ў парафіі Узвышэння Святога Крыжа ў Шаркаўшчыне прайшла адпустовая ўрачыстасць. Ганаровым госцем свята стаў біскуп Віцебскі Алег Буткевіч, які ўзначаліў Эўхарыстыю і прамовіў гамілію. Кульмінацыяй парафіяльнага фэсту стала асвячэнне новага крыжа ля будынка касцёла.

На адпустовую ўрачыстаць сабралася шмат парафіянаў і гасцей. У канцэлебраванай святой Імшы бралі ўдзел дэкан Мёрскага дэканату ксёндз Андрэй Кулік, кіраўнік беларускага дыстрыкта святароў Кангрэгацыі Найсвяцейшага Сэрца Езуса ксёндз Аляксандр Фядотаў SCJ, айцы сэрцане, а таксама святары суседніх і бліжэйшых парафій.

Звяртаючыся з прывітальным словам да прысутных, пробашч парафіі ксёндз Віктар Сініцкі SCJ заўважыў, што збіраючыся на парафіяльную ўрачыстасць, мы хочам не толькі праслаўляць Узвышэнне Крыжа, але ўглядацца ў Езуса Хрыста, які з любові да кожнага з нас аддаў сваё жыццё на крыжы.

Тэму крыжа прадоўжыў у сваёй гаміліі біскуп Алег Буткевіч. Яго Эксцэленцыя адзначыў, што крыж — гэта не толькі сімвал цярпення, але знак нашага збаўлення і нашай веры ў збаўчую місію Хрыста. Без крыжа няма збаўлення, таму там, дзе занядбоўваецца і знішчаецца крыж, знікае вера і ўзнікае пекла.

Пад крыжам мы атрымалі нашу нябесную Маці — Найсвяцейшую Панну Марыю, праз заступніцтва і апеку Якой мы набліжаемся да Хрыста.

"Няхай сённяшняя ўрачыстасць і ўшанаванне крыжа абудзіць у нас моцную веру і стане для кожнага з нас знакам збаўлення" — пажадаў на заканчэнне прамовы іерарх.

Эўхарыстычную літургію прадоўжыла працэсія з дарамі. Вернікі прынеслі да алтара свечку, як сімвал Хрыста, крыж — знак нашага збаўлення, Еванелле — Слова Божае, кветкі — знак асаблівай любові і пашаны да Пана Бога, хлеб і садавіну — плён сялянскай працы, а таксама эўхарыстычны хлеб і віно — Цела і Кроў Хрыста.

Напрыканцы Імшы пробашч парафіі ксёндз Віктар Сініцкі SCJ падзякаваў прысутным за супольную малітву і ўдзел ва ўрачыстасці. Асаблівыя словы ўдзячнасці прагучалі ў адрас тых, хто прычыніўся да яе падрыхтоўкі.

Потым, перад выстаўленым Найсвяцейшым Сакрамантам, супольна памаліліся літаніяй да Святога Крыжа і праславілі Пана Бога праз Эўхарыстычную працэсію вакол касцёла.

На заканчэнне ўрачыстасцяў біскуп Алег Буткевіч, у прысутнасці шматлікіх святароў і вернікаў, асвяціў новы крыж, які нядаўна ўсталявалі ля касцёла.

Урачыстасць у Шаркаўшчыне прайшла на адным дыханні. Гэтаму спрыялі зладжаная дзейнасці службы алтара і цудоўныя спевы мясцовага парафіяльнага хору. Прыгожа аздобленая святыня радавала вока і садзейнічала ўзнёсламу настрою свята.

Жанна Закрэўская

14.09.2024