Юбілей малітоўнай групы

Парафіяльныя аб'явы Карысныя спасылкі Літургічны каляндар Катэхеза Кантакты Відэаматэрыялы

Юбілей малітоўнай групы

У 2024 годзе спаўняецца 25 гадоў з часу заснавання ў нашай парафіі малітоўнай групы Таварыства Маці Божай Апякункі добрай смерці, якое называюць таксама Апостальствам добрай смерці і якое цесна звязана з культам Маці Божай Балеснай.

Апостальства добрай смерці – гэта малітоўная група, якая нагадвае пра вялікую неабходнасць добрай падрыхтоўкі да канчатковай сустрэчы з Богам. Той, хто ўступае ў гэтую групу, праз свае малітвы і ахвяры жадае выпрасіць для верных католікаў трыванне ў асвячальнай ласцы, для абыякавых да рэлігіі і грэшнікаў – ласку навяртання і для ўсіх – добрую і святую смерць. Рэалізуючы гэтыя мэты, той, хто належыць да Апостальства, часта скіроўвае свае думкі да вечнасці, стараецца пазбягаць граху, каб узрастаць у святасці і быць такім чынам гатовым да смерці кожную хвіліну жыцця.

Таварыства Маці Божай Апякункі добрай смерці ў цяперашняй яго форме было зацверджана Папам Піем X у 1908 г. Гэты Папа надзяліў Таварыства шматлікімі прывілеямі і адпустамі, а таксама надаў яму ўніверсальны характар, пашыраючы сферу яго дзейнасці на ўвесь Касцёл.

У 80-ых гадах мінулага стагоддзя ў Польшчы быў створаны філіял Апостальства са шбаб-кватэрай у Гурцы Кляшторнай. Дзейнасць Апостальства паступова пашырылася на тэрыторыю Заходняй Беларусі. У Гродзенскай дыяцэзіі першыя малітоўныя групы пры парафіях пачалі ўзнікаць у сярэдзіне 90-х.

Адна з такіх груп была створана ў Астраўцы, каардынатарам яе з’яўлялася Алена Карпей. У той час у Астраўцы працавала сястра-эўхарыстка Валянціна Арсоба з Мёраў, якая расказала пра дзейнасці Таварыства сваёй маці. Саламея Арсоба зацікавлася харызматам малітоўнай групы і пажадала далучыцца да Апостальства добрай смерці. Гэта быў прыкладна 1997-1998 год.

Жанчына не толькі далучылася да Таварыства але вельмі актыўна расказвала пра яго дзейнасць родным і блізкім. У хуткім часе ў Мёрах і суседніх вёсках з’явілася шмат ахвотных далучыцца да малітоўнай групы.

У той час каардынацыя дзейнасці малітоўных груп Апостальства добрай смерці пры парафіях на Беларусі ажыццяўлялася з Гуркі Кляшторнай у Польшы. Звязацца са штаб-кватэрай Апостальства ў Польшчы можна было праз ліставанне. Наладзіць сувязь з Гуркай Кляшторнай і стаць каардынатарам малітоўнай групы Апостальства добрай смерці пажадала Аліна Касач.

У лісце з Польшчы да спадарыні Аліны Касач ад 4 чэрвеня 1999 года сказана, што для стварэння малітоўнай групы Апостальства пры парафіі неабходна згода пробашча і дазвол біскупа. Спадарыня Аліна ў лісце атрыма разнастайную літаратуру, а таксама анкеты і дыпломы для новых чальцоў Апостальства.

Паступова вырашыліся арганізацыйныя пытанні, а малітоўная група актыўна пашыралася. У хуткім часе яе колькасць налічвала больш за 200 чалавек. Першыя яе ўдзельнікі: Саламея Арсоба, Тэрэса Мароз, Ян Жаўняровіч і зараз моляцца аб шчаслівай смерці.

Пасля адыходу ў вечнасць Аліну Касач змяніла Крысціна Урбановіч. Затым з 2011 па 2023 год малітоўнай групай апекавалася Крысціна Вайсковіч. Зараз каардынатарам з'яўляецца Ірына Быкава.

Для таго, каб дапасавацца да ўсіх вернікаў, да кожнага стану жыцця, Таварыства дапускае тры ступені. Гэта дае магчымасць уступіць у яго кожнаму чалавеку, без выключэння. Першая ступень прадугледжвае выказванне асабістай згоды і запіс у Кнігу таварыства, што раўназначна адданню сябе ў апеку Маці Божай Апякункі добрай смерці. На другой ступені прадугледжаны запіс у Кнігу і прыняцце на сябе абавязку маліцца кожны дзень раніцай і вечарам тры «Вітай, Марыя» з дадатковай малітвай у канцы: «Маці Божая, Апякунка добрай смерці, маліся за нас! Святы Юзаф, маліся за нас». Асобы, якія належаць да трэцяй ступені, адгаворваюць малітву, вызначаную для другой ступені, а таксама робяць штодзённы рахунак сумлення, акрамя таго, раз у месяц (напрыклад, у першую пятніцу ці першую суботу месяца) прыступаюць да сакрамантаў паяднання і Эўхарыстыі. Для іх таксама прадпісана хаця б кароткая хвіліна цішыні для разважання над годнай падрыхтоўкай да добрай смерці.

У кожную суботу і апошнюю нядзелю месяца ў галоўнай рэзідэнцыі Таварыства ў Францыі адпраўляецца святая Імша ў інтэнцыях Апостальства добрай смерці. У нашай парафіі такая Імша адпраўляецца кожную першую пятніцу месяца а 18-ай гадзіне.

Уступленне ў Таварыства Маці Божай Апякункі добрай смерці – гэта найлепшая гарантыя добрай смерці, дзейсным заахвочваннем да добрага выкарыстання часу, які Міласэрны Бог яшчэ дае нам на гэтай зямлі. Частае разважанне пра таямніцу смерці з’яўляецца найлепшым спосабам максімальнага выкарыстання Божых ласкаў і натхненняў у нашым цяперашнім жыцці.

Жанна Закрэўская, на аснове ўспамінаў Ірэны Жаўняровіч і Валянціны Арсоба

07.06.2024