Касцёл у Браславе абвешчаны малой базылікай. Што гэта азначае?

Парафіяльныя аб'явы Карысныя спасылкі Літургічны каляндар Катэхеза Кантакты Відэаматэрыялы

Касцёл у Браславе абвешчаны малой базылікай. Што гэта азначае?

17 жніўня падчас цэнтральнай святой Імшы фэсту ў гонар Маці Божай Браслаўскай, Валадаркі азёраў, які адбыўся ў Браславе ў год 25-гадовага юбілею Віцебскай дыяцэзіі, было абвешчана аб наданні Браслаўскаму санктуарыю тытула малой базылікі.

Адпаведны дакумент ватыканскай Дыкастэрыі Божага Культу і Дысцыпліны Сакрамэнтаў зачытаў на лацінскай мове сакратар Апостальскай нунцыятуры ў Мінску Монсіньёр Кшыштаф Сэрока, пасля чаго ксёндз канонік Аляксей Ляшко з Віцебска прачытаў яго пераклад на беларускую мову, які падаецца ніжэй.

Па просьбе Найдастойнейшага Алега Буткевіча, Біскупа Віцебскага, прадстаўленай у лісце ад 22 лістапада 2023 года з хадайніцтвамі і пажаданнямі духавенства і вернікаў, Дыкастэрыя Божага Культу і Дысцыпліны Сакрамэнтаў на моцы асаблівых паўнамоцтваў, дадзеных ёй Найвышэйшым Пантыфікам Францішкам, санктуарыю ў горадзе Браслаў, прысвечанаму Богу ў гонар Нараджэння Найсвяцейшай Панны Марыі, ахвотна надае тытул і годнасць малой базылікі з усімі правамі і наступствамі, а таксама літургічнымі прывілеямі, якія змяшчаюцца ў Дэкрэце De Titulo Basilicж Minoris, апублікаваным 9 лістапада 1989 года.

Усе іншыя супярэчныя пастановы не маюць моцы.

З сядзібы Дыкастэрыі Божага Культу і Дысцыпліны Сакрамэнтаў, 23 мая 2024 года,

Кардынал Артур Рошэ, прэфект;
Віторыё Франчэско Віёла ОFМ, Арцыбіскуп Сакратар.

Браслаўскі санктуарый стаў чацвёртай малой базылікай ў Беларусі. Першым (15 снежня 1990 года) тытул базылікі атрымаў катэдральны касцёл Святога Францішка Ксаверыя ў Гродне. Касцёл Унебаўзяцця Найсвяцейшай Панны Марыі ў Будславе (Нацыянальны Марыйны Санктуарый) абвешчаны базылікай 11 чэрвеня 1993 года, а катэдральны касцёл Унебаўзяцця Найсвяцейшай Панны Марыі ў Пінску — 6 лютага 1996 года.

Што ж такое базыліка?

Базыліка (з грэч. βασιλικός – каралеўскі, лац. basilica ) – у архітэктуры “выцягнуты, прамавугольны ў плане будынак, падзелены падоўжанымі радамі калонаў або слупоў на некалькі (звычайна 3 ці 5) частак (нефаў, наасаў), якія маюць самастойныя перакрыцці”.

У Старажытным Рыме базылікі выкарыстоўваліся як судовыя залы, кірмашы і інш. Пазней базыліка стала адным з асноўных тыпаў хрысціянскіх храмаў, пашырылася ў візантыйскай, сірыйскай, раманскай і гатычнай архітэктуры, а таксама ў традыцыі Адраджэння і барока.

У Беларусі базілікі з’явіліся ў канцы XVI ст., пашырыліся ў XVII — XVIII стст. Найчасцей выкарыстоўваліся ў культавых хрысціянскіх будынках (каталіцкіх, праваслаўных і уніяцкіх), зрэдку – у ратушах (Слуцк), сінагогах (Слонім).

Існуе паняцце вялікай і малой базылікі. Вялікая базыліка (лац.: basilica maior) – тытул, які надаецца найвышэйшым па рангу каталіцкім базылікам. Чатыры з іх знаходзяцца ў Рыме: Латэранская базыліка, базыліка Святога Пятра ў Ватыкане, базыліка Святога Паўла за мурамі, базыліка Маці Божай Вялікай. Дзве базылікі ў Асізі: базыліка св. Францішка, базыліка Маці Божай Анёльскай.

Малая базыліка (лац.: basilica minor ) – тытул, які надаецца адмысловым святыням. Гэты ганаровы тытул прысвойваецца Папам Рымскім у знак старажытнасці святыні, яе гістарычнай важнасці або значнасці як душпастырскага і пілігрымскага цэнтра.

Тытул «Малая базыліка» мае шэраг прывілеяў, у параўнанні са звычайнымі храмамі: у ёй, пры пэўных умовах, можа быць дарараваная поўная індульгенцыя ( поўны адпуст), святары, якія нясуць служэнне ў малой базыліцы, маюць права на адмысловую літургічную вопратку, у набажэнствах і працэсіях выкарыстоўваецца пэўныя літургічныя рэчы.

Малая базыліка павінна адпавядаць наступным умовам:

святыня адчынена на працягу ўсяго дня;
з’яўляецца месцам атрымання асаблівых ласкаў праз заступніцтва апекуна ці апякункі касцёла (напр., аздараўленні, ласкі, навяртанні і г.д.);
гістарычная каштоўнасць;
месца асаблівага культу і пілігрымавання;
дышпастырскія якасці (на працягу дня – няспынная адарацыя Найсвяцейшага Сакраманту, споведзь на працягу ўсяго дня, часта адпраўляюцца святыя Імшы і набажэнствы);
пастаянны гід у дадзеным касцёле.

Паводле Сatholicnews.by