Бласлаўленне на новы навучальны і катэхетычны год

Парафіяльныя аб'явы Карысныя спасылкі Літургічны каляндар Катэхеза Кантакты Відэаматэрыялы

Бласлаўленне на новы навучальны і катэхетычны год

1 верасня на святой Імшы а 10-ай гадзіне адбылося асвячэнне школьных прылад і бласлаўленне на новы навучальны і катэхетычны год. Падчас Эўхарыстыі маліліся не толькі за дзяцей і моладзь, якія сядзуць за парты, каб паглыбляць свае веды, але і за іх бацькоў, настаўнікаў і катэхетаў.

Падчас гаміліі вікарый ксёндз Алег Зямчонак заўважыў, што распачынаючы новы навучальны год, часам узнікаюць пытанні: "У чым сэнс майго жыцця? Якое маё пакліканне?". Кожны мае свае адказы. Але наша пакліканне, у чым бы яно не праяўлялася: у спорце, навуцы, мастацтве, — праслаўляць Пана Бога.

Святар падкрэсліў, што акрапленне вадой падтрымлівае нас у вучобе і паўсядзённых справах толькі тады, калі мы знаходзімся ў асвячальнай ласцы праз удзел у Эўхарыстыі і іншых сакрамантах.

Напрыканцы Імшы, пасля адмысловай малітвы, адбылося асвячэнне школьных прылад.

Ксёндз Алег Зямчонак заахвоціў бацькоў запісваць дзяцей і школьную моладзь на заняткі па рэлігіі, а таксама запрасіў хлопцаў і мужчын далучацца да службы алтара. Быць міністрантам — гэта важная і адказная справа. На занятках хлопцы глыбей знаёмяцца з сэнсам пэўных этапаў святой Імшы, вывучаюць Літургію і Святое Пісанне. Служэнне ля алтара дысцыплінуе і спрыяе ўсвядомленаму ўдзелу ў Эўхарыстыі.

Той, хто мае жаданне праслаўляць Пана Бога сваімі спевамі, запрашаем далучыцца да дзіцячага або дарослага парафіяльнага хору. Спадарыня Яўгенія Баговіч вучыць юных харыстаў не толькі літургічнаму спеву, але заахвочвае іх да супольнай малітвы. Кожную нядзелю, перад святой Імшой а 10-ай гадзіне, удзельнікі дзіцячага хору супольна моляцца на ружанцы.

Нагадваем, што запісацца на заняткі па рэлігіі можна ў спадарыні Наталлі Гарноўскай асабіста або па тэлефоне +375336126869 (дзеці); на заняткі для моладзі і міністантаў — ксёндз Алег Зямчонак, тэл. +375333726846; на заняткі для хору — спадарыня Яўгенія Баговіч, тэл. +375292152186.

Жанна Закрэўская

01.09.2024