Юбілейныя ўрачыстасці ў Браславе

Парафіяльныя аб'явы Карысныя спасылкі Літургічны каляндар Катэхеза Кантакты Відэаматэрыялы

Юбілейныя ўрачыстасці ў Браславе

У рамках святкавання 25-годдзя існавання Віцебскай дыяцэзіі і 15-годдзя каранацыі абраза Маці Божай Браслаўскай 16 і 17 жніўня ў Дыяцэзіяльным санктуарыі ў Браславе прайшлі ўрачыстасці пад дэвізам «Праз стагоддзі пад Тваёй апекай, Марыя!»

Сёлета прыпадае таксама 600-годдзе з часу заснавання парафіі ў Браславе і 200-годдзе з часу пабудовы тут мураванага касцёла. З гэтай нагоды на пачатку свята для ўдзельнікаў урачыстасці быў падрыхтаваны гістарычны экскурс, які правялі прадстаўнікі мясцовага краязнаўчага музея.

А 19-ай гадзіне адбылася святая Імша, на якой 70-ці кандыдатам, сярод якіх 6 нашых парафіянаў, быў удзелены сакрамант канфірмацыі. Узначаліў цэлебрацыю Эўхарыстыі біскуп Аляксандр Яшэўскі SDB — Генеральны вікарый Мінска-Магілёўскай архідыяцэзіі. У Літургіі бралі ўдзел Мітрапаліт Мінска-Магілёўскі арцыбіскуп Юзаф Станеўскі, Генеральны вікарый Мінска-Магілёўскай архідыяцэзіі біскуп Юрый Касабуцкі, Апостальскі адміністратар для грэка-католікаў у Беларусі архімандрыт Сяргей Гаек.

Святая Імша распачалася з урачыстага ўваходу ў касцёл літургічнай службы, святароў і кандыдатаў да бежмавання. У прывітальным слове біскуп Віцебскі Алег Буткевіч адзначыў, што кожны, хто прыбывае ў Браслаўскі санктуарый, адчувае не толькі прыгажосць наваколля, але асаблівым чынам, дзесьці ў глыбіні душы — прысутнасць Найсвяцейшай Панны і тыя шчодрыя ласкі, якія тут атрымлівае чалавек. Моладзі, якая ў гэты дзень прымала сакрамант канфірмацыі, іерарх пажадаў моцы, святла і натхнення Духа Святога.

На заканчэнне Імшы біскуп Алег уручыў ганаровыя граматы арганізатарам і выкладчыкам летняй школы касцёльнага спеву, якая сёлета ўжо ў сёмы раз папярэднічала фэсту Валадаркі азёраў: арганістцы браслаўскай парафіі Іне Сапун, рэгенту хора праваслаўнай царквы Усіх Засмучаных Радасці ў Мінску Вользе Янум, а таксама дацэнту Беларускай акадэміі музыкі, старшыні секцыі касцёльнай музыкі ў складзе Камісіі Божага Культу і Дысцыпліны Сакрамантаў пры Канферэнцыі Каталіцкіх Біскупаў у Беларусі, галоўнаму арганісту архікатэдральнага касцёла Найсвяцейшага Імя Марыі ў Мінску маэстра Уладзімру Неўдаху.

Пасля Эўхарыстыі малітоўную праграму працягнулі Акафіст і Крыжовы шлях, які адбыўся на вуліцы.

З наступленнем цемры, у касцёле перад цудадзейным абразом і выстаўленым Найсвяцейшым Сакрамантам вернікі склалі свае просьбы і падзякі да Маці Божай. Затым адбылася працэсія са свечкамі і копіяй цудадзейнага абраза Валадаркі азёраў. Яе ўдзельнікі на чале з пяцю біскупамі ішлі па начным Браславе, спяваючы Марыйныя песні і молячыся Ружанец.

Апоўначы цэлебрацыю святой Імшы ўзначаліў Мітрапаліт Мінска-Магілёўскі арцыбіскуп Юзаф Станеўскі. Разам з ім маліліся біскуп Віцебскі Алег Буткевіч, каад’ютар Гродзенскай дыяцэзіі біскуп Уладзімір Гуляй, Генеральныя вікарыі Мінска-Магілёўскай архідыяцэзіі біскуп Юрый Касабуцкі і біскуп Аляксандр Яшэўскі SDB, Апостальскі адміністратар для грэка-католікаў у Беларусі архімандрыт Сяргей Гаек, духоўныя асобы лацінскага і візантыйскага абрадаў, а таксама шматлікія вернікі, сярод якіх былі пілігрымы з розных мясцін Беларусі.

Упрыгожыў начную літургію сваімі спевамі хор моладзі браслаўскай парафіі.

17 жніўня а 11-ай гадзіне адбылася галоўная святая Імша на палявым алтары, якую зноў узначаліў Мітрапаліт Мінска-Магілёўскі арцыбіскуп Юзаф Станеўскі.

Перад тым, як распачаць цэлебрацыю, да сабраных звярнуўся біскуп Віцебскі Алег Буткевіч, які падзяліўся з удзельнікамі ўрачыстасці радаснай весткай: "На знак прызнання заслугаў вернікаў і духавенства Віцебскай дыяцэзіі, як і шматлікіх пакаленняў веруючых гэтай зямлі ў 600-ю гадавіну заснавання браслаўскай парафіі, 200-ю гадавіну пабудовы першага мураванага касцёла, 15-ю гадавіну каранацыі абраза Маці Божай Браслаўскай папскімі каронамі, дэкрэтам Апостальскай Сталіцы ад 23 мая 2024 года санктуарыю Маці Божай Браслаўскай быў нададзены тытул малой базылікі."

Дакумент ватыканскай Дыкастэрыі Божага Культу і Дысцыпліны Сакрамантаў зачытаў на лацінскай мове сакратар Апостальскай нунцыятуры ў Мінску Монсіньёр Кшыштаф Сэрока, пасля чаго ксёндз канонік Аляксей Ляшко з Віцебска прачытаў яго пераклад на беларускую мову.

Гамілію падчас Імшы прамовіў біскуп Уладзімір Гуляй, які засяродзіў увагу на важным значэнні марыйнай пабожнасці для кожнага хрысціяніна.

Эўхарыстычную літургію працягнула працэсія з дарамі. Парафіяне склалі свае падарункі для санктуарыя з нагоды юбілею 200-годдзя святыні і 15-годдзя каранацыі абраза: абрусы і свечкі на алтар, новы Імшал, літургічнае адзенне. Сёстры-эўхарысткі ахвяравалі камуніканты.

На заканчэнне свята біскуп Алег Буткевіч перад абразом Маці Божай Валадаркі Азёраў зачытаў Акт прысвячэння Віцебскай дыяцэзіі Маці Божай.

Да прысутных прамовілі прадстаўнікі раённай і абласной дзяржаўнай улады.

Урачыстую літургію на палявым алтары ў гэты дзень аздобіў свамі спевамі зводны хор удзельнікаў сёлетняй школы касцёльнага спеву пад кіраўніцтвам маэстра Уладзімра Неўдаха.

Жанна Закрэўская

17.08.2024