WYSIWYG Web Builder
Рымска-каталіцкая парафія Унебаўзяцця Найсвяцейшай Панны Марыі ў Міёрах
Парафіяльныя аб'явы Літургічны каляндар Катэхеза Кантакты Відэаматэрыялы
Хрост дзіцяці ва ўрачыстасць Найсвяцейшага Сэрца Езуса
7 чэрвеня ва ўрачыстасць Найсвяцейшага Сэрца Езуса на святой Імшы а 18-ай гадзіне да нашай парафіяльнай супольнасці далучылася маленькае дзіця. Хлопчык Ваня праз сакрамант хросту вызваліўся ад першароднага граху каб далей узрастаць як Божае дзіця.
Сакрамант хросту вельмі прыгожы і ўрачысты. Кожны элемент абраду нясе ў сабе пэўны вельмі важны сэнс. Цэлебрацыя хросту пачынаецца знакам крыжа, які азначае пячатку Хрыста на тым, хто будзе Яму належаць, і ласку адкуплення, якую Хрыстус набыў для нас сваёй смерцю на Крыжы. Знак крыжа дзіцяці спачатку ўдзяляе святар, а затым бацькі і хросныя.
Далей над кандыдатам чытаецца малітва экзарцызму, бо хрост азначае вызваленне ад граху і сатаны. Галоўным элементам хросту з’яўляецца вада, якая асвячаецца ў Вялікую суботу або непасрэдна перад удзяленнем сакраманту. Пасля галоўнага абраду сакраманту хросту адбываюцца дапаўняльныя абрады — намашчэнне святым алеем, накладанне белага адзення і ўручэнне свечкі.

Хрост — гэта значная падзея для сям'і і важны этап у рэлігійным выхаванні, таму на сакраманце хросту па традыцыі прысутнічалі самыя блізкія людзі. Варта памятаць, што хрост — гэта толькі пачатак, фундамент, які патрабуе далейшага развіцця, брама пераходу да таямніцы хрысціянскай веры і да жыцця паводле прынятай веры. Клапаціцца пра гэта — абавязак бацькоў, хросных і саміх ахрышчаных.


Жанна Закрэўская
07.06.2024
Рымска-каталіцкая парафія Унебаўзяцця Найсвяцейшай Панны Марыі
Адрас для карэспандэнцыі:

вул. Паштовая, д.11,
211287 г. Міёры
Віцебская вобласць
Тэлефон: +375 (2152) 41836
е-mail:kascelmery@gmail.com
Выкарыстанне матэрыялаў дазваляецца пры ўмове спасылкі (гiперспасылкi) на kascelmery.by