У Ёдах з удзелам біскупа Алега Буткевіча адзначылі трыццацігоддзе капліцы

Парафіяльныя аб'явы Літургічны каляндар Катэхеза Кантакты Відэаматэрыялы

У Ёдах з удзелам біскупа Алега Буткевіча адзначылі трыццацігоддзе капліцы

13 ліпеня ў парафіі Маці Божай Шкаплернай у Ёдах адбылася адпустовая ўрачыстасць з нагоды трыццацігоддзя дзейнасці капліцы. Ганаровым госцем свята стаў біскуп Віцебскі Алег Буткевіч, які ўзначаліў канцэлебраваную святую Імшу.

У Эўхарыстыі бралі ўдзел дэкан Мёрскага дэканату кс. Андрэй Кулік, а. Аляксандр Стока OCD з Мядзела, кс.Эдуард Сінкевіч з Варапаева, святары, якія раней працавалі ў Ёдах: кс.Ян Пугачоў з Германавічаў, кс. Чэслаў Куцмеж SCJ з Паставаў, кс. Кшыштаф Сілкоўскі SCJ, а таксама айцы сэрцане з Шаркаўшчыны, якія зараз апякуюцца мясцовай парафіяй: пробашч кс. Віктар Сініцкі і вікарый кс.Генадзь Лаўніковіч.

На пачатку святой Імшы ксёндз Віктар Сініцкі SCJ прывітаў усіх прысутных, якія сабраліся на ўрачыстасць, і ўзгадаў гісторыю мясцовай парафіі і капліцы. Да ўрачыстасці была таксама злачана фотавыстава, на якой можна было пазнаёміцца з асноўнымі момантамі з жыцця парафіі за апошнія трыццаць гадоў.

Капліца ў Ёдах носіць тытул Маці Божай Шкаплернай — гэта другая найбольш традыцыйная назва ўспаміну Найсвяцейшай Панны Марыі з Гары Кармэль, які Касцёл адзначае 16 ліпеня. Пра аб'яўленні Маці Божай на гары Кармэль і пра шкаплер падчас гаміліі распавёў айцец кармеліт Аляксандр Стока. Святар адзначыў, што шкаплер з'яўляецца знакам асаблівай апекі Панны Марыі. Кожны, хто надзявае шкаплер, далучаецца праз яго да марыйнай пабожнасці Кармэлю: мае ўдзел ва ўсіх духоўных плёнах малітвы і жыцця кармэліцкай сям'і. "Шкаплер не з'яўляецца абярэгам, ён мае вялікую моц толькі для тых, хто носіць яго пабожна і сваім жыццё наследуе Маці Божую" — падкрэсліў прамоўца.

Напрыканцы святой Імшы ксёндз Генадзь Лаўніковіч SCJ выказаў словы ўдзячнасці ўсім, хто рыхтаваў і прыняў удзел ва ўрачыстасці. Да святара далучыліся парафіяне, якія падзякавалі ардынарыю Віцебскай дыяцэзіі біскупу Алегу Буткевічу за цэлебрацыю Эўхарыстыі, а таксама святарам, якія раней працавалі ў парафіі, за іх душпастырскую апеку.

Пасля Літургіі перад Найсвяцейшым Сакрамантам разам памаліліся Літаніяй да Найсвяцейшай Панны Марыі з гары Кармэль, а затым адбылася эўхарыстычная працэсія вакол капліцы.

На заканчэнне свята ахвотныя мелі магчымасць урачыста прыняць шкаплер, каб наследаваць Панну Марыю і служыць Ёй. Перад тым, як апрануць шкаплер кандыдатам, айцец Аляксандра Стока OCD нагадаў, што прыняцце шкаплера адбываецца толькі адзін раз. Калі шкаплер знішчыцца або згубіцца, то кожны сам можа надзець новы. Пры гэтым не абавязкова асвячаць новы шкаплер або медалік, а знішчаны шкаплер з тканіны трэба спаліць.

Затым адбылася супольная малітва, пасля якой кандыдаты, ушаноўваючы пацалункам, прынялі з рук айца Аляксандра асвечаныя шкаплеры.

Жанна Закрэўская