Чарговы мастаскі пленэр адбыўся ў Друі

Парафіяльныя аб'явы Карысныя спасылкі Літургічны каляндар Катэхеза Кантакты Відэаматэрыялы

Чарговы мастаскі пленэр адбыўся ў Друі

З 19 па 24 жніўня ў Друі праходзіў мастацкі пленэр, які ў гэтым годзе сабраў не толькі майстроў пэндзля і алоўка, але і фотамастакоў. У нядзелю (25 жніўня) у кляштары пры касцёле дзейнічала выстава работ мастакоў, якая завяршылася падвядзеннем вынікаў працы.

Мастацкія пленэры пры друйскім касцёле па ініцыятыве былога пробашча парафіі ксяндза каноніка Сяргея Сурыновіча ладзяцца штогод пачынаючы з 2015 года. Мэта пленэру — наладжванне дыялогу паміж рэлігіяй і мастацтвам. Цяперашні пробашч парафіі — ксёндз Вячаслаў Адамовіч — працягнуў гэтую важную ў культурным і рэлігійным плане справу.

На пленэр сёлета прыехала 8 мастакоў з розных куткоў Беларусі. Штодня яны працавілі над сваімі карцінамі.

Кожны тварыў у сваёй тэхніцы і мастацкім жанры, але агульнай рысай для ўсіх мастакоў стала тое, што кожны з іх за час пленэру намаляваў друйскі касцёл. Вельмі цікава было пабачыць, як выглядае святыня вачыма розных мастакоў.

У канцы тыдня да пленэру далучыліся фотамастакі, якія здымалі прыгожыя краявіды і "палявалі" за цікавымі момантамі з жыцця Друі. Вынікі іх працы можна будзе пабачыць пазней, калі будуць апрацаваныя і надрукаваныя фотаздымкі.

У рамках пленэру была арганізавана выстава работ заслужанага дзеяча мастацтваў Рэспублікі Беларусь Барыса Аракчэева (19.04.1026-10.03.2013) "Палітры лета".

Мастацкі пленэр — гэта не толькі праца, але і культурны адпачынак. Для ўдзельнікаў пленэру была зладжана экскурсія па Друі, а таксама ў Ідолта і Мілашова, дзе мастакі, між іншым, пазнаёміліся з гісторыяй каталіцкіх храмаў. 23 жніўня ў друйскім касцёле прайшла музычная вечарына Алеся Лася, які таксама ўдзельнічаў у пленэры і стварыў шэраг цікавых прац.

Па завяршэнні пленэру, мастакі выказалі словы ўдзячнасці ксяндзу Вячаславу Адамовічу за арганізацыю імпрэзы і за магчымасць культурнага і духоўнага ўзрастання.

Жанна Закрэўская

24.08.2024