Ксёндз канонік Сяргей Сурыновіч завяршыў душпастырскае служэнне ў Друі

Парафіяльныя аб'явы Літургічны каляндар Катэхеза Кантакты Відэаматэрыялы

Ксёндз канонік Сяргей Сурыновіч завяршыў душпастырскае служэнне ў Друі

30 чэрвеня парафія Найсвяцейшай Тройцы ў Друі развіталася са сваім пробашчам — доктарам біблійнай тэалогіі, ксяндзом канонікам Сяргеем Сурыновічам, які ў адпаведнасці з Дэкрэтам біскупа Віцебскага Алега Буткевіча прызначаны на далейшую працу пробашчам парафіі св.Антонія Падуанскага ў Віцебску.

У гэты сонечны і спякотны дзень у друйскім касцёле было шматлюдна. На развітальную святую Імшу з пробашчам вернікі прыходзілі сем'ямі. Паўсюль зіхацелі дзіцячыя тварыкі, што для невялікага мястэчка сёння сапраўдны цуд. Людзі ж сярэдняга і старэйшага пакалення прыходзячы ў святыню ў задуменні схіляліся на калені ў малітве.

Амаль дванаццаць гадоў свайго святарскага служэння ксёндз канонік Сяргей Сурыновіч прысвяціў друйскай парафіі і заслужыў любоў і павагу сваіх парафіянаў. Для многіх з іх ён стаў мудрым дарадцам, разважлівым душпастырам і духоўным кіраўніком.

Менавіта падчас працы ў Друі святар абараніў доктарскую дысертацыю па біблійнай тэалогіі ва Універсітэце Стэфана Вышынскага ў Польшчы (2019г.), а ў сакавіку гэтага года быў прызначаны канонікам Віцебскага катэдральнага капітула.

На апошняй святой Імшы ў Друі ў якасці пробашча ксёндз Сяргей Сурыновіч удзяліў сакрамант хросту тром немаўлятам. Дзве дзяўчынкі і адзін хлопчык далучычыліся ў гэты дзень да парафіяльнай супольнасці.

Напрыканцы Імшы парафіяне выказалі шчырыя словы ўдзячнасці свайму душпастыру за яго шматгадовае служэнне: удзяленне сакрамантаў, фарміраванне парафіяльнай супольнасці, клопат пра добраўпарадкаванне і аздабленне касцёла і прыкасцёльнай тэрыторыі, кляштара, за захаванне гістарычнай спадчыны, вяртання абраза Маці Божай Друйскай, за магчымасць рэлігійнага і культурнага ўзрастання.

Па ініцыятыве ксяндза Сяргея Сурыновіча пачынаючы з 2015 года ў Друі штогод праходзілі мастацкія пленэры, а 2021 годзе была арганізавана ўнікальная выстава абразоў.

Як адзначылі самі парафіяне, пералічыць усё, што зроблена пад кіраўніцтвам святара, даволі цяжка і практычна немагчыма.

Чырвоныя ружы, як сімвал вялікай павагі і любові, вернікі ўручылі свайму, ужо былому пробашчу, з пажаданнем плённай працы ў новым месцы на ніве Пана.

Завяршальным падарункам стала песня "На развітанне...", якую выканаў парафіяльны хор пад прыгожыя і шчымлівыя акампаніменты скрыпкі.

На тварах многіх вернікаў слёзы... Так бывае заўсёды, калі надыходзіць час развітвацца з тымі, да каго мы прызвычаіліся і аддалі частку свайго сэрца. Хто шчыра і добрасумленна нясе служэнне ў нашым асяроддзі.

Завяршылася святая Імша агульным фотаздымкам на памяць.

Жанна Закрэўская

30.06.2024