Навучыцца любіць

Парафіяльныя аб'явы Літургічны каляндар Катэхеза Кантакты Відэаматэрыялы

Навучыцца любіць

З 17 па 19 сакавіка ў нашай парафіі прайшлі велікапосныя рэкалекцыі на тэму "Навучыцца любіць". Духоўныя разважанні, якія прапанаваў айцец Аляксандр Жарнасек МІС, пробашч парафіі Святой Тройцы ў Росіцы, паспрыялі больш глыбокаму разуменню сутнасці і сэнсу любові з пункта гледжання веры.

У першы дзень рэкалекцый айцец Аляксандр заахвоціў задумацца над тым, як часта ў сваім жыцці мы задаём сабе пытанні: "Што хоча мне сказаць Бог? Ці задаволены Ён мной? Што Ён зрабіў бы на маім месцы? Што Бог хоча сказаць у пэўнай жыццёвай сітуацыі, падчас гэтых рэкалекцый?" Калі такія пытанні не ўзнікаюць, то гэта сапраўдная трагедыя для веруючага чалавека. Дакладней, адсутнасць такіх пытанняў гаворыць аб недасканаласці і павярхоўнасці нашай веры.

Бог — гэта любоў. У Евангеллі ёсць шмат эпізодаў, дзе Езус падкрэслівае важнасць любові да Бога і бліжняга. Любоў — гэта характэрная рыса дзяцей Божых. Менавіта па ўчынках любові распазнаюць нас, як вучняў Хрыста. Адна з найбольш важных задач у нашым жыцці — навучыцца любіць.

У другі дзень рэкалекцый айцец Аляксандр звярнуў увагу на тое, што любоў — гэта не прыгожыя словы, а канкрэтныя крокі і дзеянні на карысць іншага чалавека. На прыкладзе разнастайных жыццёвых сітуацый з уласнага жыцця, святар паказаў, што ўчынкі любові часам могуць супярэчыць "цвярозаму" розуму і не заўсёды аказваюцца ўдзячнымі. Здараецца так, што тыя, каму мы зрабілі дабро, могуць нас расчараваць ці нават пакрыўдзіць. Аднак гэтыя акалічнасці не павінны спыняць. Трэба заўсёды мець адкрытыя сэрцы і пастаянна вучыцца любіць тых, хто побач з намі і патрабуе дапамогі. Той, хто чыніць дабро іншым, удасканальваецца ў любові.

Пасля святой Імшы адбылася сустрэча для моладзі і ўсіх ахвотных, падчас якой ішла размова пра спецыяльны інфармацыйны сэрвіс TikTok. Спасылаючыся на меркаванні філосафаў сучаснасці, айцец Аляксандр акрэсліў небяспечныя моманты гэта інфармацыйнага рэсурсу. Патрабаванні сэрвісу — кароткія ролікі. У большасці выпадкаў яны не нясуць карыснай інфармацыі, што прыводзіць да дэградацыі асобы. У карыстальнікаў TikTok, асабліва тых, хто самі размяшчаюць уласныя відэа на платформе, фарміруецца залежнасць. Калі рэйтынгі чарговых ролікаў змяншаюцца, іх аўтары перажываюць стрэсавыя сітуацыі.

У апошні дзень рэкалекцый айцец Аляксандр спыніўся на рысах і формах любові. Святар адзначыў, што найбольш эгаістычнай формай любові з'яўляецца мацярынская любоў. Часта жанчына, якая нарадзіла дзіця, лічыць яго сваёй поўнай уласнасцю і не дае магчымасці для яго незалежнага існавання нават у дарослым стане. Такая мацярынская гіперапека прыводзіць да сапраўднай трагедыі ў жыцці іх дзяцей. Любоў — гэта дар, а не жаданне падпарадкаваць сваім поглядам іншага чалавека. Яна не прымушае, не маніпуліруе і не фарсіруе.

Святы Фама Аквінскі казаў: "Любіць — гэта значыць рабіць дабро". Гэта адпавядае любой форме любові: мацярынскай, сяброўскай, паміж мужчынам і жанчынай. Калі мы кажам, што любім іншага чалавека, аднак думаем толькі пра сябе, то ў гэтым няма любові. Прыклад сапраўднай любові паказаў нам Бог, які аддаў Сына Свайго Адзінага на ўкрыжаванне, каб выбавіць грэшнага чалавек.

Завяршаючы рэкалекцыі айцец Аляксандр заўважыў, што для кожнага чалавека вялікае значэнне мае сяброўская любоў. Калі мы маем таго, з кім можам шчыра падзяліцца цяжкасцямі і перажываннямі, нам лягчэй пераадолець розныя жыццёвыя праблемы. Важна не толькі мець сапраўднага сябра але і быць ім. Каб быць сапраўдным сябрам, трэба ўвесь час вучыцца любіць.

Напрыканцы Імшы парафіяне выказалі словы ўдзячнасці айцу Аляксандру Жарнасеку за змястоўную навуку падчас рэкалекцый, духоўную падтрымку і паслугу ў канфесіянале.

Жанна Закрэўская