Урачыстасці ў Росіцы

Парафіяльныя аб'явы Карысныя спасылкі Літургічны каляндар Катэхеза Кантакты Відэаматэрыялы

Урачыстасці ў Росіцы

2 і 3 жніўня ў Росіцы адбыліся ўрачыстасці на ўшанаванне благаслаўлёных марыянаў Юрыя Кашыры і Антонія Ляшчэвіча. Пешшу, на ровары або на аўтатранспарце дабіраліся пілірымы ў росіцкі санктуарый, каб у чарговы раз скласці даніну памяці тым, хто аддаў сваё жыццё дзеля бліжняга.

У гэтым годзе ў пешай пілігрымцы "Друя-Росіца" прынялі ўдзел 110 чалавек з розных куточкаў Беларусі. Большасць пілігрымаў прайшлі ўвесь шлях ад пачатку, аднак былі і тыя, хто далучыўся да пілігрымкі падчас дарогі. Значная частка вернікаў дабіралася да росіцкага санктуарыя на аўтобусе або на ўласным транспарце. Незалежна ад таго, як прыбылі пілігрымы, іх сардэчна віталі ў Росіцы.

Як і штогод, айцы-марыяне падрыхтавалі даволі насычаную праграму, таму кожны мог выбраць малітоўную практыку па ўласным жаданні. Урачыстасці распачаліся святой Імшой для пілігрымаў, пасля яе адбыўся акафіст да росіцкіх мучанікаў, які ўзначаліў архімандрыт Сяргей Гаек. Затым айцец Аляксандр Шамрыцкі МІС, капелан Місіі Добрага Самараніна, прамовіў канферэнцыю.

Адарацыю Найсвяцейшага Сакраманту з малітвай праслаўлення правёў пробашч росіцкай парафіі айцец Аляксандр Жарнасек МІС. У гэты час ахвотныя маглі скарыстацца сакрамантам споведзі.

Апоўначы распачалася ўрачыстая святая Імша з удзелам біскупа Віцебскага Алега Буткевіча і Апостальскага адміністратара грэка-католікаў у Беларусі архімандрыта Сяргея Гаека МІС. У Літургіі бралі ўдзел шматлікія святары, сярод якіх найстарэйшы святар у Беларусі а.Юзаф Пятушка МІС. Літургію сваімі спевамі ўпрыгожыў зборны моладзевы хор.

У гаміліі, звяртаючыся да вернікаў, біскуп Алег Буткевіч падкрэсліў, што благаслаўлёныя Юрый Кашыра і Антоній Ляшчэвіч з'яўляюцца для нас прыкладам сведчання вернасці пакліканню і вернасці чалавечнасці. Вялікай трагедыяй для чалавека і для грамадства з'яўляецца адсутнасць веры. Яна выклікае канфлікты, не толькі фізічныя, але, найперш, у сэрцы чалавека. Благаслаўлёныя росіцкія мучанікі засталіся са сваімі вернікамі, каб умацаваць іх у веры. "Не хістайцеся веры і штодня вызнавайце яе!" — заклікаў іерарх.

Пасля Эўхарыстыі адбылася начная працэсія на пляц мучаніцтва. Трымаючы ў руках запаленыя свечкі, вернікі ўзносілі свае малітвы да ўсіх святых, просячы іх аб заступніцтве. Кульмінацыяй супольнай малітвы стала ўшанаванне Крыжа.

Начное чуванне прадоўжыў росіцкі Крыжовы шлях, разважанні да якога падрыхтавала пісьменніца Ірына Жарнасек.

Малітва ў касцёле доўжылася да раніцы і завяршылася святой Імшой а 10-ай гадзіне. Падчас знаходжання ў Росіцы вернікі мелі магчымасць запісаць свае інтэнцыі, набыць рэлігійную літаратуру і набрацца духоўных сіл, каб сваім жыццём наследваць Хрыста.

Жанна Закрэўская