Вяртаюцца эцюды і карціны

Парафіяльныя аб'явы Літургічны каляндар Катэхеза Кантакты Відэаматэрыялы

Вяртаюцца эцюды і карціны

13 красавіка ў нашай святыні адбылася значная культурная падзея. Наш зямляк, вядомы мастак Вячаслаў Шамшур, у прысутнасці шматлікіх гасцей урачыста перадаў у дар парафіі чатырнаццаць сваіх работ, якія, у асноўным, прысвечаны яго малой радзіме —Міёршчыне.

Карціны былі дастаўлены з Віцебска пры падтрымцы Віцебскага дзяржаўнага ўніверсітэта імя П.М.Машэрава, у якім Вячаслаў Шамшур працуе з 1970 года. Работы, напісаныя ў тэхніцы пастэль, мастак стварыў на працягу 1997-2020 гг.. На палотнах касцёл, набярэжная, старыя міёрскія вуліцы, а таксама вясковыя пейзажы, балота Ельня, Друя-Педруя і нават Кракаў.

Перад урачыстай імпрэзай у бакавой наве касцёла была зладжана выстава, на якую завіталі родныя і знаёмыя аўтара, а таксама тыя, хто цікавіцца мастацтвам. Бліжэй пазнаёміцца з вядомым земляком і яго творчасцю прыйшлі таксама навучэнцы раённай школы мастацтваў, якія з непадробным захапленнем вывучалі творы майстра.

Пасля агульнага азнаямлення з выставай распачалася міні-канферэнцыя. З уступным словам да прысутных звярнуўся арганізатар імпрэзы вядомы празаік і публіцыст Франц Сіўко (таксама наш зямляк, які, між іншым, пад псеўданімам Францішак Дубраўскі піша і на рэлігійныя тэмы — заўв. аўт.). Франц Сіўко падкрэсліў, што мы перажываем важную культурную падзею.

Мастак Вячаслаў Шамшур нарадзіўся 20 жніўня 1942 года ў вёсцы Пціцкія і ўжо з малых гадоў праяўляў цікавасць да малявання. У 1962 годзе ён паступіў на мастацка-графічны факультэт Віцебскага педінстытута і з той пары жыве і працуе ў Віцебску, аднак ніколі не губляў сувязі з Міёршчынай. Цяпер, дзякуючы ўзаемапаразуменню і падтрымцы з боку Міёрскай парафіі, шэраг прац мастака будзе захоўвацца на яго малой радзіме.

Пра творчасць і навуковую дзейнасць Вячаслава Шамшура расказаў яго калега Міхась Цыбульскі — вядомы беларускі жывапісец і педагог, кандыдат мастацтвазнаўства, дацэнт кафедры выяўленчага мастацтва Віцебскага дзяржаўнага ўніверсітэта імя П. М. Машэрава.

Выступоўца адзначыў, што Вячаслава Шамшура нярэдка называюць класікам пейзажнага жанру, і ў гэтым няма вялікага перабольшвання. Яго творы ў поўнай меры адлюстроўваюць сучасныя ўяўленні пра пейзаж. Мастак пачынаў з лінарытаў (лінарыт — гравюра на лінолеуме, — заўв. аўт.) і на працягу некалькі год выдатна засвоіў гэту тэхніку. Ужо ў ёй мастак прадэманстраваў свае лепшыя якасці графіка, сапраўднага майстра кампазіцыі. Пачынаючы з 1990-ых гадоў Вячаслаў Шамшур больш увагі надае тэхніцы пастэлі, якая ў яго творчасці набыла новае гучанне, жывапісную дэкаратыўнасць і падкрэсленую дынаміку. Шчырасць у творчасці Вячаслава Шамшура — гэта ў першую чаргу адкрытасць яго асобы і пачуццяў. Гэта сардэчнасць і душэўнасць, даступнасць і зразумеласць у створаных ім вобразах.

Вячаслаў Шамшур не толькі мастак, але і навукоўца. Ён з'яўляецца аўтарам шматлікіх навуковых прац і суаўтарам 4-га тома "Гісторыі мастацтва Беларусі". Плённая навуковая дзейнасць стала падставай для прысваення яму ў 1993 годзе вучонага звання прафесара.

Звяртаючыся да прысутных Вячаслаў Шамшур заўважыў, што дарога дадому заўсёды нясе яму энергію дабрыні і чысціні. "Сёння будучы тут, у Міёрах, мне да слёз прыемна бачыць твары маіх родных. Перадача твораў Міёрскаму касцёлу не выпадковая. Касцёл з'яўляецца адным з цэнтраў духоўнай культуры. Гэта самае надзейнае месца для захоўвання маіх прац. Я ўдзячны пробашчу парафіі ксяндзу Андрэю Куліку за такую магчымасць. Для мяне гонар, што мае працы будуць захоўвацца ў касцёле, да якога належыць большая частка маёй радні. Тут маліліся мой дзед і мая маці, тут бываў мой бацька. <...> "

На заканчэнне імпрэзы са словамі ўдзячнасці да мастака звярнуўся пробашч парафіі ксёндз Андрэй Кулік. Святар адзначыў, што Бог кожнаму чалавеку дае свае таленты. Спадара Вячаслава Бог надзяліў талентам адлюстроўваць свет так, як ён гэта бачыць. Ахвяруючы парафіі і Касцёлу свае працы, мастак Вячаслаў Шамшур прыносіць дар Пану Бог за той талент, які атрымаў. Ён, як чалавек, які клапоціцца пра будучыню і мае багаты жыццёвы досвед, разумее, што мы павінны быць удзячныя Богу, за тыя ласкі, якія Ён нам спасылае. Хай Пан Бог аддзячыць за гэты жэст і ўзнагародзіць Вячаслава Шамшура здароўем і даўгалеццем.

Словы ўдзячнасці мастаку выказалі таксама парафіяне.

Сустрэчу працягнула экскурсія па выставе, якую правёў сам аўтар. Мастак расказаў пра гісторыю стварэння асобных карцін, падзяліўся некаторымі сакрэтамі свайго майстэрства і адказаў на пытанні наведвальнікаў. Яшчэ доўгі час дзеці і дарослыя не адпускалі мастака. Адкрытасць і дабразычлівасць майстра прыцягвала і захапляла. Увесь час побач была і жонка мастака — Раіса Іванаўна, якая разам прыехала з Віцебска, каб падтрымаць мужа.

Пасля экскурсіі па выставе для гасцей і ахвотных парафіянаў пра гісторыю Міёрскага касцёла расказаў краязнаўца Вітольд Ермалёнак.

Дзве гадзіны праляцелі хутка і незаўважна. Наперадзе была яшчэ адна сустрэча ў раённай бібліятэцы. Вячаслаў Шамшур прывёз у дар для яе пяць сваіх прац. Адмыслова да дня перадачы прац Вячаслава Шамшура касцёлу Унебаўзяцця Найсвяцейшай Панны Марыі ў Мёрах і Мёрскай раённай бібліятэцы Людміла Сіманёнак з Віцебска напісала верш "Вяртаюцца эцюды і карціны".

Увесну дождж зямлю і неба лучыць
І лашчыць Вока Божага краі.
На Мёршчыне спяваюць неўміруча
Ўтрапёныя шпакі ды салаўі.

Сваёй радзіме кожны з нас павінны.
Няхай жа да вытоку адкрыцця
Вяртаюцца эцюды і карціны —
Плён годнага й няпростага жыцця.

У мастака дакладнейшая мерка:
Зіму і восень, лета і вясну
Ён апране у гожае люстэрка —
Ня горшае за Вяту ці Дзісну.

Як вадаспад, натхненне кліча гучна
Ў святло касцёла і ў свае гаі.
Няхай штогод спяваюць неўміруча
На Мёршчыне шпакі ды салаўі.

Жанна Закрэўская

13.04.2024