Як адзначыў аўтар праекта мастак Аляксандр Чарняўскі, стварэнне скульптуры – гэта доўгі і крапатлівы працэс. На падрыхтоўчым этапе праводзілася работа з рэферэнцамі ( англ. referencе – даведка, базавы матэрыял для стварэння ўласных ідэй, заўв. аўт). У ходзе вывучэння малюнкаў і скульптур апостала Мацея іншых аўтараў і з улікам стылістычных асаблівасцей фігур апосталаў, якія размешчаны ў нашай святыні, распрацоўваўся ўласны эскіз. На яго аснове са скульптурнага пластыліну была выканана мадэль апостала спачатку невялікая, а потым – у поўны рост.
Наступны этап – фармоўка – уключаў выраб гіпсавых форм. Пластылінавая мадэль апостала пакрывалася спачатку тонкім слоем сілікону, а затым слоем гіпсу. Пасля высыхання формы здымаліся і ачышчаліся. Гэта быў найбольш працяглы і крапатлівы этап, бо ад якасці форм залежыў выгляд будучай скульптуры.
