Юбілейная святыня — касцёл Нараджэння Маці Божай у Верхнядзвінску

Парафіяльныя аб'явы Літургічны каляндар Катэхеза Кантакты Відэаматэрыялы

Юбілейная святыня — касцёл Нараджэння Маці Божай у Верхнядзвінску

Касцёл Нараджэння Маці Божай у Верхнядзвінску з'яўляецца самай паўночнай юбілейнай святыняй Віцебскай дыяцэзіі. Адносна невялікі, але вельмі прыгожы храм, які мае багатую гісторыю, чакае пад сваім дахам пілігрымаў ужо сёння.

Першыя ўспаміны пра існаванне драўлянага касцёла ў Дрысе (з 1962 года город носіць назву Верхнядзвінск — заўв. аўт.) адносіцца да 1734 года. У 1809 годзе быў пабудаваны каменны касцёл. Парафіяй спачатку апекаваліся дамінікане, а потым дыяцэзіяльныя святары. У 1941 годзе ў Дрысу даязджалі айцы марыяне і сёстры-эўхарысткі з Друі. Пасля вайны касцёл быў зачынены і паступова будынак пачаў разбурацца.

У 1989 годзе быў зарэгістраваны касцельны камітэт і парафія ў Верхнядзвінску, а святыню перадалі вернікам. Першым пасляваенным пробашчам стаў сальватарыянін а.Стэфан Пракурат SDS. У 1993-1994 гг. у Верхнядзвінск з Мёраў даязджаў ксёндз Уладас Пятрайціс. З сярэдзіны 1994 па верасень 2015 года парафіяй апекаваліся айцы-капуцыны, а з 6 верасня 2015 года па сённяшні дзень душпастырскае служэнне ў Верхнядзвінску нясе наш зямляк — ксёндз Аляксандр Грыцкевіч, які расказаў нашаму сайту пра парафію і юбілейную святыню.

Святар адзначыў, што парафія ў Верхнядзвінску хоць і вялікая тэрытарыяльна, аднак налічвае ўсяго каля 300 вернікаў. У нядзелю і святы касцёл наведвае прыкладна 50-70 чалавек. Дзяцей і моладзі няшмат, але ёсць літургічная служба алтара і свой невялікі парафіяльны хор.

Атрымаць званне юбілейнай святыні — гэта, вядома ж, гонар для любой парафіі, які патрабуе і пэўнай адказнасці. Пакуль значнага наплыву вернікаў у юбілейную святыню не назіралася. Хутчэй за ўсё таму, што паўночна-заходні накірунак у зімовы час не вельмі папулярны. У летні час чакаецца больш пілігрымаў.

Накіроўваючыся ў індывідуальную пілігрымку ў Верхнядзвінск, варта ўлічыць, што святыня звычайна адчынена толькі ў гадзіны цэлебрацыі святой Імшы (у панядзелак, сераду і пятніцу а 18-ай гадзіне, у астатнія дні, у тым ліку і нядзелю, а 10-ай гадзіне).

Нагадваем, што праз наведванне юбілейнай святыні, сакрамант пакаяння, падмацаванне святой Камуніяй і малітву ў інтэнцыях Святога Айца можна атрымаць поўны адпуст, прабачэнне і адпушчэнне сваіх грахоў, які таксама можна ахвяраваць за душы, якія церпяць у чысцы.

Жанна Закрэўская,
24.02.2025