Рараты

Парафіяльныя аб'явы Літургічны каляндар Катэхеза Кантакты Відэаматэрыялы

Чуваць на прыйсце Езуса разам з Марыяй

Распачаўся Адвэнт, таму традыцыйна ў Касцёле адбываюцца Рараты — святыя Імшы ў гонар Маці Божай, якія дазваляецца праводзіць у любы дзень Адвэнту, акрамя нядзелі і ўрачыстасцей, якія прыпадаюць на гэты перыяд. Іх назва паходзіць ад першых слоў лацінскага гімна „Rorate coeli desuper” (Спусціце, нябёсы, нам расу), які раней спявалі на пачатку такіх Імшаў.

Рараты асаблівым чынам нагадваюць нам пра Марыю, якая падобная да ранішняй зоркі, што апярэджвае ўсход сонца. Так і Марыя папярэдзіла прыход Езуса Хрыста — нашага Сонца і Святла ўсяго свету.

У Беларусь раратняя Імша прыйшла з Захаду, дзе была вядома ўжо ў XIII ст. Падчас гэтай Імшы запальваюць дадатковую свечку, якая называецца раратняй і з’яўляецца сімвалам Апякункі перадкаляднага чакання — Марыі. Найсвяцейшая Дзева з’яўляецца не толькі Апякункай чакання, але перш за ўсё прыкладам чакання і прыпадабнення Богу. Наш удзел у Раратах з’яўляецца прыгожай паставай чакання разам з Марыяй надыходу Збавіцеля.

У Касцёле існуе шэраг традыцый, якія спадарожнічаюць перыяду Адвэнту і Раратам. Элементы падрыхтоўкі да Божага Нараджэння старанна перадаюцца вернікамі з пакалення ў пакаленне. Нейкія з іх набылі нацыянальныя асаблівасці, нейкія застаюцца нязменнымі незалежна ад часу і месца.

Адной з такіх традыцый з'яўляецца лесвіца, якая ладзіца ў святынях або катэхетычным класе. Яна незвычайная, таму што ўяўляе зыход Бога з неба на зямлю. Сходы як бы адлюстроўваюць дні Адвэнту. На самым версе драбіны знаходзіцца Віфлеемская Зорка або фірура Маці Божай, унізе яслі, а на саміх сходах фігурка Дзіцяці Езуса, якая на працягу Адвэнту зыходзіць па сходах ніжэй і ніжэй, каб 25 снежня — у дзень Божага Нараджэння — з’явіцца ў яслях. Гэтая лесвіца як бы адлюстроўвае дні перыяду чакання, дапамагае верніку адчуць у сэрцы прыбліжэнне радаснага свята.

У гэтым годзе ксёндз Алег Зямчонак прапанаваў дзецям нашай парафіі ўзнавіць яшчэ адну традыцыю — вандруючыя фігуркі. Гэты звычай заснаваны на прыняцці да наступных раратаў у свае дамы фігуркі Дзіцяткі Езуса, Маці Божай ці анёлка. У чыю сям'ю накіруецца адна з фігурак вызначацца з дапамогай лёсаў. Дзецям неабходна прыносіць на кожную раратнюю Імшу зорачкі, з указаннем прозвішча і імя дзіцяці, а таксама добрых ўчынкаў, якія яны зрабілі пасля апошніх раратаў. Напрыканцы Імшы святар будзе выцягваць тры зорачкі і вызначаць каму трапіў шчаслівы лёс.

Прымаючы фігурку Езуса, Маці Божай ці анёлка ў свае дамы, уся сям’я асаблівым чынам іх ушаноўвае праз супольную малітву, спяваючы адвэнтавыя песні, чытаючы Святое Пісанне. Такая форма перажывання Адвэнту дае вельмі многа магчымасцей увядзення ў сям’ю духа малітвы і адвэнтавага настрою.

Па даўняй традыцыі ў першы дзень Раратаў дзеці атрымалі аснову для гульні-самаклейкі, якую яны будуць збіраць на працягу Адвэнту. Нагадваем, што раратнія Імшы ў нашай святыні цэлебруюцца кожны панядзелак, сераду і пятніцу а 7-ай гадзіне.

Жанна Закрэўская
04.12.2023