У Лепелі адбылося дыяцэзіяльнае спатканне груп Апостальства дапамогі душам чысцовым

Парафіяльныя аб'явы Літургічны каляндар Катэхеза Кантакты Відэаматэрыялы

У Лепелі адбылося дыяцэзіяльнае спатканне груп Апостальства дапамогі душам чыстцовым

26 кастрычніка 2024 года ў Лепелі ў касцёле Святога Казіміра прайшло трэцяе агульнадыяцэзіяльнае спатканне груп Апостальства дапамогі душам чыстцовым, якія дзейнічаюць у парафіях Віцебскай дыяцэзіі.

На сустрэчу, якая распачалася а 11-ай гадзіне, завіталі вернікі з Браслава, Глыбокага, Дзеркаўшчыны, Пагошча, Паставаў, Полацка, Новалукомля і Міёр. Напачатку ксёндз Славамір Самковіч, душпастыр груп Апостальства дапамогі душам чыстцовым Віцебскай дыяцэзіі, прывітаў удзельнікаў. Святар падкрэсліў, што трэцяе спатканне праводзіцца на ўсходзе Віцебскай дыяцэзіі, каб даць сведчанне дзейнасці груп Апостальства таксама і на гэтай тэрыторыі.

Спатканне працягнула супольная малітва. Вяночак за памерлых правяла аніматар групы нашай парафіі Марыя Макарэвіч, а потым адбылася адарацыя Найсвяцейшага Сакраманту, падчас якой ахвотныя мелі мачымасць прыступіць да сакраманту споведзі.

Пасля адарацыі адбылася канферэнцыя «Да сустрэчы ў чыстцы», якую прамовіў пробашч парафіі ў Дзеркаўшчыне ксёндз канонік Валерый Орсік. Напачатку святар звярнуў увагу на тое, што такое чысцец і чаму мы павінны маліцца за душы чыстцовыя. Прамоўца падкрэсліў: "Чысцец — гэта не нейкае канкрэтнае месца, а стан душы".

Прыводзячы разнастайныя сведчанні містыкаў і святых, якія мелі візіі і асаблівую сувязь з душамі, якія церпяць у чыстцы, святар заўважыў, што малітва, цярпенне і апостальства з'яўляюцца найлепшымі сродкамі выбаўлення душаў з чыстца. Паводле містычкі Марыі Сіммы, душам чыстцовым можна дапамагчы ахвяраваўшы за іх святую Імшу, духоўныя і фізічныя цярпенні, святы Ружанец, Крыжовы шлях, адпусты, міласціну і добрыя ўчынкі, а таксама праз запальванне свечкі на могілках і ў касцёле, акрапленне асвечанай вадой.

Падводзячы вынікі канферэнцыі, ксёндз Валерый заахвоціў, каб “мы не стваралі чысцец у сваіх дамах праз непаслухмянасць, злосць, расчараванне, гнеў, ляноту і розныя грахі”.

Кульмінацыяй сустрэчы стала Эўхарыстыя а 13-ай гадзіне, якую ўзначаліў пробашч Лепельскай парафіі ксёндз Уладзімір Заянчкоўскі. Святар адзначыў, што ў гэтым годзе парафія адзначае 420 год свайго існавання, таму ў святыні створаны экспазіцыі з літургічнымі і рэлігійнымі рэчамі мінулых гадоў. Сапраўднай каштоўнасцю з'яўляюцца 23 рэліквіярыі з рэліквіямі розных святых, якія шануюцца не толькі католікамі, але і братамі праваслаўнымі. Гэта зроблена для таго, каб сюды маглі прыехаць людзі рознага веравызнання і памаліцца.

Пачэснае месца ля алтара займаюць рэліквіі Святога Крыжа, і адзення Хрыста. Пасля святой Імшы кожны ўдзельнік сустрэчы меў магчымасць падысці, дакрануцца і памаліцца ля рэліквій.

Напрыканцы Эўхарыстыі ксёндз Славамір Самковіч выказаў словы ўдзячнасці гаспадару парафіі ксяндзу Уладзіміру Заянчкоўскаму за гасціннасць, ксяндзу каноніку Валерыю Орсіку за прамоўленую канферэнцыю, і ўсім удзельнікам з розных куткоў нашай Віцебшчыны за прысутнасць і малітву. Куратар груп Апостальства анансаваў наступную сустрэчу, якая адбудзецца ў кастрычніку 2025 года ў Полацку.

Агульнае фота на памяць ля помніка святому Яну Паўлу ІІ завяршыла спатканне.

Падсілкаваўшыся смачным абедам, вернікі вырушылі ў дарогу дадому.

Жанна Закрэўская

26.10.2024

Да сустрэчы ў чыстцы.
Канферынцыя ксяндза каноніка Валерыя Орсіка

Частка 1

Частка 2

Частка 3