У Шаркаўшчыне адзначылі трыццацігоддзе кансэкрацыі святыні

Парафіяльныя аб'явы Літургічны каляндар Катэхеза Кантакты Відэаматэрыялы

У Шаркаўшчыне адзначылі трыццацігоддзе кансэкрацыі святыні

12 верасня парафія Узвышэння Святога Крыжа ў Шаркаўшчыне ўрачыста адсвяткавала трыццацігоддзе кансэкрацыі касцёла і дзесяцігоддзе існавання ў парафіі руху "Маці ў малітве". Урачыстую святую Імшу з гэтай нагоды ўзначаліў ардынарый Віцебскай дыяцэзіі біскуп Алег Буткевіч.

На святочную Эўхарыстыю сабраліся не толькі мясцовыя вернікі, але і госці з суседніх парафій, а таксама ўдзельніцы руху "Маці ў малітве" Віцебскай дыяцэзіі, якіх можна было лёгка пазнаць па адмысловых белых шаліках з эмблемай супольнасці. Раздзяліць радасць падзеі прыйшлі таксама і прадстаўнікі раённай улады.

На пачатку ўрачыстасці парафіяне хлебам-соллю прывіталі галоўнага госця свята — ардынарыя Віцебскай дыяцэзіі біскупа Алега Буткевіча.

Сёння вернікі ў Шаркаўшчыне маюць прыгожы і велічны храм, які пабудаваны на вякі. Аднак у сэрцах старэйшага пакалення яшчэ жыве памяць пра разбураную драўляную святыню, ад якой дзякуючы Божаму провіду і намаганням вернікаў цудам захавалася стацыя Крыжовага шляху, а макет і фотаздымкі былога драўлянага касцёла даюць магчымасць уявіць, як ён выглядаў.

Уводзінамі ў святкаванне ўрачыстасці стаў невялікі гістарчыны экскурс пра новую святыню, будаўніцтва якой у 1992 годзе распачаў ксёндз Юзаф Булька. Пад яго кіраўніцтвам быў закладзены фундамент будучага касцёла, а затым усімі будаўнічымі працамі кіраваў ксёндз Крыштаф Сілкоўскі SCJ, які 8 чэрвеня 1992 г. быў прызначаны пробашчам у Шаркаўшчыну. Дзякуючы намаганням святара і актыўнай падтрымцы вернікаў у свята Узвышэння Святога Крыжа 14 верасня 1996 г. касцёл быў асвечаны кардыналам Казімірам Свёнткам. З таго часу парафіяне штогод збіраюцца на ўрачыстасць каб аддаць пашану Крыжу Збаўцы і падзякаваць за ўсе атрыманыя ласкі.

Як адзначылі прадстаўнікі касцёльнага камітэту, да сёлетняй святочнай падзеі парафія рыхтавалася на працягу пэўнага часу. Быў праведзены касметычны рамон храма, замененыя старыя вокны на шклопакеты, пакладзена плітка, добраўпарадкавана тэрыторыя, зроблена шмат іншых спраў, каб святыня не толькі выглядала ўтульна і прыгожа, але сапраўды стала домам малітвы для вернікаў.

Святая Імша распачалася з урачыстага ўваходу літургічнай службы і святароў у храм. Эўхарыстыю ўзначаліў біскуп Алег Буткевіч. Разам з ім пры алтары служылі сямнаццаць святароў, сярод іх канцлер Віцебскай дыяцэзіі ксёндз канонік Віктар Місевіч, дэкан Мёрскі ксёндз Андрэй Кулік, а таксама першы пробашч адноўленай Шаркаўшчынскай парафіі і будаўнік святыні ксёндз Крыштаф Сілкоўскі SCJ, які зараз жыве ў Любліне.

На пачатку Эўхарыстыі прысутных прывітаў пробашч парафіі ксёндз Віктар Сініцкі SCJ. Святар выказаў шчырыя словы ўдзячнасці ўсім, хто ў свой час прымаў удзел у будаўніцтве святыні, а таксама тым, хто рыхтаваў касцёл да свята. Гаспадар парафіі заахвоціў прысутных да супольнай малітвы, каб праславіць Крыж збаўлення і Крыж перамены і падзякаваць Пану Богу за трыццацігоддзе касцёла.

Падчас гаміліі біскуп Алег Буткевіч звярнуўся да гісторыі парафіі. Іерарх адзначыў, што парафія ў Шаркаўшчыне мае багатую гісторыю і бярэ свой пачатак у 1906 годзе, калі яна была вылучана з парафіі ў Пагосце і стала самастойнай. На той момант новая парафія налічвала каля 2500 вернікаў. Праз год у мястэчку Старая Шаркаўшчына быў пабудаваны драўляны касцёл, які ў лістападзе 1907 г. быў асвечаны ксяндзом Ежы Мачульскім, дэканам Дзісненскім, пад тытулам Узвышэння Святога Крыжа. Аднак святыня праіснавала нядоўга. У 1963 годзе касцёл быў разабраны. Новая гісторыя парафіі распачалася ў 1989 годзе.

Віцебскі ардынарый узгадаў святароў, якія ў розныя часы працавалі ў Шаркаўшчыне і выказаў словы ўдзячнасці прысутным айцам сэрцанам за іх душпастырскую дзейнасць у парафіі, падкрэсліўшы, што ўсё, што мы робім у сваім жыцці, павінны рабіць на хвалу Божую.

На завяршэнне Эўхарыстыі парафіяне падзякавалі біскупу Алегу Буткевічу і ўсім прысутным святарам за ўдзел ва ўрачыстасці. Асаблівыя словы ўдзячнасці былі скіраваныя ў бок будаўніка святыні і шматгадовага пробашча ксяндза Крыштаф Сілкоўскі SCJ і ксяндза Чэслава Куцмежа SCJ, які пэўны час таксама быў пробашчам парафіі.

Ад імя раённай улады словы віншавання з нагоды парафіяльнай урачыстасці і святкавання юбілею святыні выказаў старшыня раённага Савета дэпутатаў Сяргей Арэшкаў, які ўручыў пробашчу парафіі ксяндзу Віктару Сініцкаму SCJ Падзяку старшыні Шаркаўшчынскага райвыканкама Сяргея Кашмілы за папулярызацыю хрысціянскіх каштоўнасцяў і захаванне культурнай і гістарычнай спадчыны.

Пасля літургіі перад выстаўленым Найсвяцейшым Сакрамантам, супольна памаліліся літаніяй да Святога Крыжа і праславілі Пана Бога праз Эўхарыстычную працэсію вакол касцёла. Завяршылася набажэнства спевам гімна Te Deum і бласлаўленнем Найсвяцейшым Сакрамантам.

Свята прадоўжылася на вуліцы. Па старадаўняй традыцыі на плошчы ля святыні быў зладжаны міні-кірмаш і выстава майстроў раённага Цэнтра рамёстваў. Каб удзельнікі свята змаглі падсілкавацца, была арганізавана дэгустацыя страў беларускай нацыянальнай кухні.

У гэты ж час на імправізаванай сцэне распачаўся канцэрт «Святло Хрыстова над Дзісенскім краем». Прыгожыя і звонкія галасы самадзейных артыстаў разляталіся па наваколлі, дорачы прысутным радасны і святочны настрой.

Жанна Закрэўская

12.09.2026