Адпустовая ўрачыстасць

Парафіяльныя аб'явы Літургічны каляндар Катэхеза Кантакты Відэаматэрыялы

Адпустовая ўрачыстасць і асвячэнне пладоў новага ўраджаю

15 жніўня наша парафія адзначыла адпустовую ўрачыстасць у гонар Унебаўзяцця Найсвяцейшай Панны Марыі. Па даўняй традыцыі ў гэты дзень мы прыносім у святыню букеты з кветак, каласоў і зёлак, кошыкі з садавінай і гароднінай — плёнам працы нашых рук, каб блаславіць іх.

Галоўная святая Імша, якую ўзначаліў наш зямляк ксёндз Аляксандр Грыцкевіч, пробашч парафіі Нараджэння Маці Божай у Верхнядзвінску, адбылася а 18-ай гадзіне. На ўрачыстую Эўхарыстыю сабраліся не толькі мясцовыя вернікі але і шматлікія госці, сярод іх ксёндз Віктар Сініцкі SCJ, пробашч парафіі Узвыўшэння Святога Крыжа ў Шаркаўшчыне і сястра эўхарыстка Ірэна Варонька, якая, дарэчы, таксама паходзіць з нашай парафіі.

Канцэлебраваная святая Імша распачалася з урачыстага ўваходу літургічнай службы і святароў у храм. На пачатку Эўхарыстыі прысутных прывітаў пробашч парафіі ксёндз Андрэй Кулік. Святар выказаў словы ўдзячнасці ўсім, хто сабраўся на супольную малітву, а таксама прычыніўся да падрыхтоўкі і правядзення ўрачыстасці.

Сваю гамілію ксёндз Аляксандр Грыцкевіч распачаў словамі верша нашага мясцовага паэта Браніслава Мароза:

Дзе гараць найяснейшыя зоры,
Там мястэчка юнацтва—Міёры,
Што мяне прытуляе, як маці.
Расчыняю ўсе вокны ў хаце.
Хай на крылах ляціць з паднябесся
Жаўрука мілагучная песня,
Светлай радасцю поўняцца грудзі.
Добры дзень, мае родныя людзі.

Святар падкрэсліў, што Міёры з'яўляюцца таксама і яго "мястэчкам юнацтва". Мястэчка, у якім ён рабіў першыя крокі па жыцці і першыя крокі да Бога. Узгадаўшы асноўныя моманты свайго жыцця, якія звязаныя з нашым горадам, ксёндз Аляксандр заўважыў: "Час уцякае, вечнасць чакае. Сённяшняя ўрачыстасць якраз датычыць вечнасці."

Далей, разважаючы над словамі Святога Пісання на ўрачыстасць, святар засяродзіў увагу на ролі Маці Божай у збаўленні чалавека. "Марыя стала той, праз каго Пан Бог адчыніў нам браму нябеснага валадарста. Яе Magnificat — гэта гімн перамогі над смерцю, гімн падзякі і праслаўлення. <...> Наша сённяшняя малітва ў мёрскай святыні — знак таго, што наша душа, як і Марыя, спявае гімн Богу" — адзначыў прамоўца.

Пасля Літургіі перад выстаўленым Найсвяцейшым Сакрамантам памаліліся Літаніяй да Найсвяцейшай Панны Марыі. Затым адбылася адмысловая эўхарыстычная працэсія вакол касцёла, якая з'яўляецца не проста прыгожым і ўрачыстым момантам, але, найперш, выразам нашай веры і важкім спосабам праслаўлення Езуса Хрыста ў Эўхарыстыі.

На заканчэнне працэсіі разам заспявалі гімн “Цябе, Бога, праслаўляем”. Завяршылася ўрачыстасць бласлаўленнем пладоў новага ўраджаю.

Жанна Закрэўская

15.08.2025