У новы навучальны год з Божым бласлаўленнем
30 жніўня на святой Імшы а 10-ай гадзіне было шматлюдна, паўсюль зіхацелі ўсмешкі дзяцей. Літургія вызначалася пэўнай урачыстасцю. Скончыўся Белы тыдзень на працягу якога хлопчыкі і дзяўчынкі, якія ў мінулую нядзелю прынялі Першую Святую Камунію, прыходзілі кожны дзень у касцёл каб умацаваць сваю веру. Мінавіта яны чыталі Слова Божае, спявалі псальмы, звярталіся з просьбамі да Пана Бога ў малітве вернікаў. Падчас Імшы маліліся таксама за бацькоў, настаўнікаў і катэхетаў, каб яны выконвалі свае абавязкі адпаведна Божых загадаў і былі годным узорам для сваіх дзяцей.
Напрыканцы Імшы ксёндз-пробашч Андрэй Кулік нагадаў, што распачынаецца не толькі школьны але і катэхетычны год. Бацькі маюць абавязак клапаціцца аб рэлігійным выхаванні сваіх дзяцей, у тым ліку падрыхтоўцы іх праз катэхезу да прыняцця сакрамантаў. Заняткі па рэлігіі распачнуцца ў верасні. Запісацца на катэхезу можна ў спадарыні Наталлі Гарноўскай па тэлефоне +375336126869.
Завяршылася набажэнства традыцыйным бласлаўленнем дзяцей і асвячэннем школьных прылад да новага навучальнага года.
Жанна Закрэўская
30.08.2020
