Бласлаўленне на новы навучальны і катэхетычны год

Парафіяльныя аб'явы Літургічны каляндар Катэхеза Кантакты Відэаматэрыялы

Хрост дзіцяці і бласлаўленне на новы навучальны год

30 жніўня на святой Імшы а 12-ай гадзіне адбылося дзве важныя падзеі. Праз сакрамант хросту да парафіяльнай супольнасці далучылася маленькая дзяўчынка, а дзеці і моладзь атрымалі Божае бласлаўленне на новы навучальны і катэхентычны год.

Летні адпачынак для дзяцей скончыўся. 1 верасня яны сядуць за школьныя парты. У хуткім часе распачнецца таксама і катэхетычны год, таму, падкрэсліваючы важнасць рэлігійнай адукацыі і хрысціянскага выхавання, якое павінна распачынацца з першых дзён жыцця дзіцяці, падчас святой Імшы быў удзелены сакрамант хросту.

Гэты сакрамант вельмі прыгожы і ўрачысты. Адным з дапаўняльных абрадаў хросту, які мае вельмі глыбокі сэнс, з'яўляецца ўручэнне свечкі, якая запальваецца ад пасхала. Святар перадае яе бацькам са словамі: "Прыміце святло Хрыста" і нагадвае ім аб абавязку выхавання дзіця ў каталіцкай веры.

Згодна з вучэннем Касцёла, пасля ўдзялення хросту бацькі, удзячныя Богу і верныя прынятаму абавязку, павінны прывесці дзіця да спазнання Бога, усыноўленым дзіцём якога яно стала, а таксама падрыхтаваць яго да прыняцця канфірмацыі і да ўдзелу ў Найсвяцейшай Эўхарыстыі.

Напрыканцы Імшы адбылося асвячэнне школьных прылад. Перад бласлаўленнем пробашч парафіі ксёндз Андрэй Кулік заўважыў, што рэлігійная адукацыя, якая адбываецца праз катэхезу, з'яўляецца падмуркам выхавання кожнага веруючага чалавека. Катэхеза не завяршаецца Першай Камуніяй, ёсць яшчэ падрыхтоўка да сакраманту канфірмацыі, іншыя віды катэхезы, а таксама самаадукацыя. Святар заахвоціў бацькоў запісваць сваіх дзяцей на заняткі па рэлігіі, які ў гэтым годзе ў нашай парафіі распачнуцца з 19 верасня.

Пасля адмысловай малітвы святар удзяліў бласлаўленне на новы навучальны і катэхетычны год і акрапіў вадой дзяцей і школьныя прылады, якія яны прынеслі.

Жанна Закрэўская

30.08.2026