Эўхарыстычная працэсія — публічнае вызнанне веры

Парафіяльныя аб'явы Літургічны каляндар Катэхеза Кантакты Відэаматэрыялы

Эўхарыстычная працэсія — публічнае вызнанне веры

У нядзелю 7 чэрвеня пасля святой Імшы а 12-ай гадзіне адбылася Эўхарыстычная працэсія вакол касцёла з нагоды ўрачыстасці Найсвяцейшага Цела і Крыві Езуса Хрыста, якая з'яўляецца выразам нашай любові і пашаны да Пана Бога ўкрытага ў Найсвяцейшым Сакраманце.

«Свята Эўхарыстыі» — менавіта такую першапачатковую назву мела ўрачыстасць Найсвяцейшага Цела і Крыві Хрыста, якая адзначаецца з ХІІІ стагоддзя. Эўхарыстычная працэсія з чатырма традыцыйнымі алтарамі з’явілася пазней. Першыя звесткі пра яе паходзяць з Германіі, з Кёльна, і адносяцца да ХIV ст.

Падчас шэсця вернікі традыцыйна спыняліся каля чатырох адмысловых алтароў, дзе чыталіся ўрыўкі са Святога Пісання. Гэтая лічба звязана з чатырма евангелістамі. Кожны з іх па-свойму гаворыць пра таямніцу Эўхарыстыі. Такім чынам мы глядзім на Пана, схаванага ў кавалку хлеба, вачыма апосталаў.

Як заўсёды творча, з адказнасцю і любоўю падыйшлі парафіяне да стварэння алтароў. Па традыцыі першы алтар рыхтавалі бацькі дзяцей, якія ў гэтым годзе прынялі Першую Камунію, другі — чальцы Парафіяльнай рады, трэці — колы Жывога Ружанца, чацвёрты — удзельнікі Апостальства добрай смерці і Апостальства дапамогі душам чыстцовым.

Працэсія Божага Цела — гэта праява супольнага выразу веры ў Бога, прысутнага ў Гостыі. Яна заўсёды ўражвае велічнасцю і хараством: прыгожа аздобленыя алтары, харугвы, дзеці ў белых строях, якія нядаўна прынялі Першую Камунію. Святар нясе ў манстранцыі Цела Хрыста, перад якім дзяўчынкі сыплюць кветкі і пялёсткі. Людзі ідуць у працэсіі за Хрыстом, сваім адзіным Правадыром, які паказвае шлях з часовага да вечнага жыцця.

На заканчэнне Літургіі пробашч парафіі ксёндз Андрэй Кулік выказаў словы ўдзячнасці ўсім, хто рыхтаваў алтары і прыняў удзел ва ўрачыстасці: літургічнай службе алтара, парафіяльнаму хору і ўсім вернікам, якія склалі публічнае вызнанне веры праз удзел у Эўхарыстычнай працэсіі.

Жанна Закрэўская

07.06.2026