Будслаў вітаў пілігрымаў

Парафіяльныя аб'явы Літургічны каляндар Катэхеза Кантакты Відэаматэрыялы

Будслаў вітаў пілігрымаў

4 і 5 ліпеня ў Нацыянальным санктуарыі Маці Божай Будслаўскай прайшлі ўрачыстасці пад дэвізам «Міласэрнасць Божая — давяраем Табе». Сёлета ў Будслаў пешкі і на роварах прыбылі 2484 пілігрымы. Шырокая малітоўная праграма спрыяла глыбокаму духоўнаму перажыванню свята.

З раніцы 4 ліпеня будслаўская святыня чакала сваіх пілігрымаў. Прыгожа аздоблены палявы алтар з адмысловым дываном з кветак з выявай эмблемы Юбілейнага года прывабліваў вока.

Ужо апоўдні радасныя воклічы і спевы першых пілігрымаў абудзілі Будслаў. Ля ўваходу ў санктуарый іх вітаў пробашч будслаўскай парафіі ксёндз Дзмітрый Дубовік.

Падчас сустрэчы пілігрымаў, мітрапаліт Мінска-Магілёўскай архідыяцэзіі арцыбіскуп Юзаф Станеўскі, цытуючы Папу Бенэдыкта ХVІ, адзначыў: колькі людзей, столькі і шляхоў да Бога. Сапраўды, у Будславе можна было сустрэць розныя пілігрымкі, якія сваімі шляхамі дабіраліся да Маці Божай. Две пілігрымкі: з Мінска і Мядзела, прыехалі на роварах, а яшчэ дваццаць прыйшлі пешшу.

Сярод іх посная пакутная пілігрымка пад кіраўніцтвам ксяндза каноніка Уладзіслава Завальнюка з Мінска (24 чалавекі, 130 км за 4 дні), самотная з Глыбокага (адзін чалавек, 64 км за 2 дні), аднадзённая сямейная з Пузыроў (268 удзельнікаў, сярод іх 40 дзіцячых вазкоў, 15 км), а таксама парафіяльныя і пад кіраўніцтвам айцоў з розных манаскіх і законных супольнасцяў.

Самымі вялікімі ў гэтым годзе былі пілігрымкі з Маладзечна пад кіраўніцтвам айцоў францішканаў (363 чалавекі, з іх 50 пілігрымаў з Расіі, 120 км за 5 дзён) і з Мінска пад кіраўніцтвам айцоў хрыстусоўцаў (354 чалавекі, 125 км за 5 дзён). Найбольшую адлегласць — 293 км за 9 дзён пераадолелі 104 пілігрымы з Баранавічаў. Моладзевая евангелізацыйная пілігрымка са Смаргоні, пад кіраўніцтвам айцоў салезіянаў, складалася выключна з маладых людзей (145 чалавек, 105 км, 6 дзён).

З Віцебскай дыяцэзіі прыйшло 7 пілігрымак. Самай вялікай была пілігрымка, якая ішла з Паставаў. У складзе гэтай пілігрымкі таксама былі вернікі з іншых парафій, дзе працуюць айцы сэрцане: з Шаркаўшчыны, Варапаева. 228 чалавек за 3 дні пераадолелі 77 км. Самая працяглая па адлегласці была пілігрымка з Віцебска — 250 км за 7 дзён прайшлі 52 пілігрымы, сярод іх ардынарый Віцебскай дыяцэзіі біскуп Алег Буткевіч. Самая доўгай па часе стала пілігрымка з Росіцы: 8 дзён, 210 км, 50 чалавек. Былі таксама пілігрымкі з Браслава, Глыбокага і Полацка.

Многія пілігрымкі мелі не толькі свой адмысловы колер: францішканская — карычневы, сэрцанская — чырвоны, марыянская — блакітны, сальватарыянская — жоўты і інш., але і сваю духоўную адметнасць. Кожны, хто жадаў прыйсці да Маці Божай у складзе пілігрымкі, мог знайсці для сябе найбольш прыдатны варыянт.

Звяртаючыся да пілігрымаў, мітрапаліт Мінска-Магілёўскай архідыяцэзіі арцыбіскуп Юзаф Станеўскі падрэсліў, што вельмі радуецца з таго, што моладзь не пабаялася вырушыць у пілігрымку і стаць не толькі пілігрымамі надзеі, але і апосталамі веры і надзеі.

Жанна Закрэўская

05.07.2025