Урачыстасці ў Будславе

Парафіяльныя аб'явы Літургічны каляндар Катэхеза Кантакты Відэаматэрыялы

Урачыстасці ў Будславе

5 і 6 ліпеня ў Нацыянальным санктуарыі Маці Божай Будслаўскай прайшлі ўрачыстасці пад дэвізам «Найсвяцейшае Сэрца Езуса — супакой і паяднанне нашае». Сёлета ў Будслаў пешкі і на роварах прыбылі 1982 пілігрымы. Шырокая малітоўная праграма спрыяла глыбокаму духоўнаму перажыванню свята.

Будслаў штогод збірае вялікую колькасць вернікаў. Тут заўсёды пануе любоў і радасць. Радасць ад сустрэчы са сваімі знаёмымі, з якімі пасябраваў раней у пілігрымках або на рэлігійных сустрэчах. Радасць ад таго, што такая вялікая колькасць дзяцей, моладзі і маладых сем'яў збіраецца ля абраза Маці Божай Будслаўскай, каб даверыцца Ёй і аддацца пад Яе апеку.

Малітоўнае чуванне распачалося 5 ліпеня а 18-ай гадзіне святой Імшой для пілігрымаў. Вернікі радасна віталі святароў і біскупаў, якія ішлі ў працэсіі на Эўхарыстыю. Яны працягвалі свае далоні, каб дакрануцца да рук святароў і падзяліцца цяплом сваёй душы.

Цэлебрацыю святой Імшы для пілігрымаў узначаліў каад'ютатар Гродзенскай дыяцэзіі біскуп Уладзімір Гуляй. Для наймалодшага ў Беларусі каталіцкага іерарха гэтая Эўхарыстыя стала яго "біскупскай прыміцыяй" на Будслаўскім фэсце.

Акафіст у выкананні хору Грэка-Каталіцкай Царквы і Марыйныя нешпары прадоўжылі малітву праслаўлення Маці Божай. Крыжовы шлях правялі айцы Кармэліты Босыя.

За паўгадзіны да апоўначы адбылася традыцыйная працэсія са свечкамі і копіяй цудадзейнага абраза.

Цэлебрацыю святой Імшы апоўначы ўзначаліў Мітрапаліт Мінска-Магілёўскі арцыбіскуп Юзаф Станеўскі. У Эўхарыстыі прынялі ўдзел біскупы Юрый Касабуцкі, Алег Буткевіч, Уладзімір Гуляй, Казімір Велікаселец, Аляксандр Яшэўскі і Апостальскі адміністратар для католікаў візантыйскага абраду ў Беларусі архімандрыт Сяргей Гаек, а таксама вялікая колькасць святароў і кансэкраваных асобаў, вернікаў з розных мясцін Беларусі.

Другі дзень урачыстасцяў быў таксама насычаны на падзеі.

А 11-ай гадзіне распачалася галоўная святая Імша, якую ўзначаліў Апостальскі Нунцый у Беларусі арцыбіскуп Антэ Ёзіч. Завяршаючы сваё служэнне ў нашай краіне, ён пакінуў беларускім вернікам свой духоўны запавет.

На заканчэнне святой Імшы быў учынены акт прысвячэння Касцёла на Беларусі Найсвяцейшаму Сэрцу Езуса. Гэта падзея адбылася па ініцыятыве Старшыні Канферэнцыі Каталіцкіх Біскупаў у Беларусі арцыбіскупа Мітрапаліта Мінска-Магілёўскага Юзафа Станеўскага з нагоды 125-гадовага юбілею з часу інтранізацыі Найсвяцейшага Сэрца Езуса ў паўсюдным Касцёле.

Прысвячэнне прайшло на палявым алтары перад Нацыянальным санктуарыем у прысутнасці ўсіх каталіцкіх біскупаў Беларусі, Апостальскага адміністратара для беларускіх грэка-католікаў архімандрыта Сяргея Гаека, шматлікіх святароў, кансэкраваных асобаў і вернікаў з усёй краіны і з-за мяжы. Акт быў здзейснены арыбіскупам Юзафам Станеўскім перад выстаўленым Найсвяцейшым Сакрамантам і перад абразом Сэрца Езуса з незвычайнай гісторыяй.

Пасля Літургіі адбылася Эўхарыстычная працэсія, якая завяршыла ўрачыстасці.

На працягу ўсяго свята працаваў традыцыйны Будслаўскі кірмаш, на якім можна было набыць рэлігійную літаратуру, календары на наступны год і іншыя рэлігійныя рэчы. У намётах выдавецтва "ПРО ХРЫСТО" прадставілі ўнікальнае выданне — новы малітоўнік "Прасіце і атрымаецце". Гэта збор літаній, навэнаў і вяночкаў, якія ўяўляюць сабой вялікае багацце малітоўнай спадчыны Каталіцкага Касцёла і які выдадзены ўпершыню ў нашым мясцовым Касцёле.

Жанна Закрэўская