Завяршылася дабрачынная акцыя "Дапамагчы можа кожны"

Парафіяльныя аб'явы Літургічны каляндар Катэхеза Кантакты Відэаматэрыялы

Завяршылася дабрачынная акцыя "Дапамагчы можа кожны"

З 17 па 30 сакавіка ў нашай парафіі праходзіла дабрачынная акцыя "Дапамагчы можа кожны", якая была накіравана на аказанне дапамогі сацыяльнаму прытулку ў Дзісне, дзе знаходзяцца дзеці, бацькі якіх занядбоўваюць сваімі бацькоўскімі абавязкамі. 2 красавіка рэчы, якія сабралі ў ходзе акцыі, перадалі адрасатам.

Ідэя правядзення дабрачыннай акцыі ўзнікла ў Любові Шабалтас, якая спачатку падзялілася сваёй ініцыятывай з маці і, атрымаўшы яе падтрымку, пачала дзейнічаць. Першапачаткова была распрацавана інфармацыйная ўлётка. Маючы яе на руках, Любоў і Вілія Шабалтас звярнуліся з прапановай правядзення акцыі да пробашча парафіі ксяндза Андрэя Куліка. Святар падтрымаў дабрачынную справу і даў згоду на яе правядзенне.

Прыгожа аздобленыя ініцыятарамі праекта скрыні з улёткамі з'явіліся ў святыні ў нядзелю 17 сакавіка і кожны дзень папаўняліся новымі рэчамі.

Дабрачынная акцыя знайшла шырокі водгук у сэрцах парафіян. Вернікі імкнуліся прыносіць карысныя для навучання і адпачынку дзяцей рэчы: канцэлярскія прыналежнасці, развіваючыя гульні, канструктары, пластылін, размалёўкі, а таксама сродкі гігіены і шмат іншага. Не забываліся вядома ж і пра салодкія пачастункі. Кожны ахвяраваў у залежнасці ад сваіх магчымасцей і ў выніку справа пераўзышла ўсе чаканні арганізатараў. Разам сабралі даволі вялікую колькасць рэчаў, таму было прынята рашэнне частку з іх перадаць у шматдзетныя малазабяспечаныя сем'і.

2 красавіка ініцыятары акцыі разам з ксяндзом Андрэем Куліком наведалі сацыяльны прытулак у Дзісне і перадалі падарункі. Непадробная радасць ззяла на тварах дзяцей, калі яны іх атрымалі, а потым з цікавасцю і захапленнем знаёміліся са зместам.

Адміністрацыя і педагогі сацыяльнага прытулку выказалі шчырыя словы ўдзячнасці пробашчу парафіі, арганізатарам і ўдзельнікам акцыі за аказаную дапамогу.

Жанна Закрэўская, тэкст

Фота Любові Шабалтас і педагогаў сацыяльнага прытулку