Нядзеля Добрага Пастыра

Парафіяльныя аб'явы Літургічны каляндар Катэхеза Відэаматэрыялы Кантакты

Знайсці сапраўднае шчасце. Нядзеля Добрага Пастыра

У IV Велікодную нядзелю, якую Касцёл называе нядзеляй Добрага Пастыра, адзначаецца Сустветны дзень малітваў аб пакліканнях да святарства і манаскага жыцця. У гэты дзень мы асаблівым чынам праз малітву звяртаемся да Пана Бога, каб Ён з любоўю ўзглянуў на маладыя сэрцы і “адправіў работнікаў у Свой вінаграднік”.

Нядзеля Добрага Пастыра ў чарговы раз нагадвае нам, што наш Пастыр – Езус Хрыстус, а авечка – гэта кожны з нас, адданы і даручаны апецы Пастыра.

Езус, Добры Пастыр, жадае клапаціцца пра нас заўсёды, у тым ліку ў цяжкасцях, аддаючы за нас сваё жыццё. Ён робіць гэта таму, што мы ў Яго аўчарні, дзе кожная авечка каштоўная, а ўсю аўчарню злучае адна сувязь – любоў.

На жаль, сённяшнія часы паказваюць, што мы ахвотней ідзём за тымі, хто прапануе нам свет у больш каляровых фарбах, свет без праблем і цяжкасцяў. Часта нам кажуць, што трэба рабіць усё, што толькі нам падабаецца, бо жыццё ж занадта кароткае, каб мучыць сябе рознымі абмежаваннямі. А ў сваю чаргу ўсё гэта вядзе чалавека да расчаравання і страты сэнсу жыцця.

На прыёме ў адным з англійскіх замкаў вядомы тэатральны акцёр чытаў фрагменты твораў Шэкспіра. Пасля кожнага фрагмента гучала бура апладысментаў. У артыста спыталіся, ці захоча ён чытаць творы, аб якіх папросяць гледачы. Ён згадзіўся. Старэйшы, стары святар, спытаў, ці гатовы ён прачытаць псальм 23. Акцёр прыняў прапанову, але паставіў умову: пасля маёй дэкламацыі той жа псальм прамовіць святар.

Майстар слова стаў на узвышэнні і пачаў чытанне. Ён прамаўляў дакладна, звонка, быццам біў мячом па струне. Калі ён скончыў, зала выбухнула доўгімі апладысментамі. Затым устаў святар і дрыжачым голасам пачаў прамаўляць асобныя выразы. Зала агарнулася цішынёй і задуменнасцю, калі ён пачаў гаварыць: “Пан – пастыр мой, ні ў чым не буду мець нястачы. Ён дазваляе спачываць мне на зялёных пашах...”

Калі ён скончыў, ніхто не пляскаў, панавала маўчанне. Праз хвіліну яшчэ раз выступіў акцёр і сказаў: “Сябры мае! Я заваяваў вашы вушы, але мой наступнік завалодаў вашымі сэрцамі. Розніца ў тым, што я ведаю псальм, а ён ведае Пастыра”.

Езус жадае, каб мы зірнулі ў глыбіню свайго сэрца. Распазналі нанова сваё пакліканне: святарскае, кансэкраванае, сужэнскае або жыццё ў самоце. Усвядомілі, для каго яго атрымалі. Каму хочам прысвяціць сваё жыццё. Калі мы хочам рабіць гэта добра, няхай на наша жыццё маюць уплыў не тыя, хто жадае завалодаць нашымі вушамі, а Той, хто жадае нашага сэрца – Езус, Добры Пастыр.

Будзем жа разважліва падыходзіць да таго, што прапануе нам свет, у імя дабра і нашага шчасця, каб у Езусе Хрысце – Добрым Пастыру – мы адкрылі і знайшлі сапраўднае шчасце.

Grodnensis.by