У Друі завяршыўся мастацка-літаратурны пленэр

Парафіяльныя аб'явы Літургічны каляндар Катэхеза Кантакты Відэаматэрыялы

У Друі завяршыўся мастацка-літаратурны пленэр

З 2 па 9 жніўня пры парафіі Найсвяцейшай Тройцы ў Друі прайшоў мастацка-літаратурны пленэр "Друя — месца спаткання гісторыі і мастацтва". Гэта падзея стала ўнікальнай магчымасцю для жыхароў старажытнага мястэчка і яго ваколіц дакрануцца да мастацтва: літаратурнага, музычнага, выяўленчага і тэатральнага.

Пленэр, які ладзіцца ў Друі ажно з 2015 года, упершыню прайшоў у такім фармаце. Узбагаціць яго літаратурнай творчасцю прапанаваў пробашч парафіі ксёндз Вячаслаў Адамовіч. Дапамогу ў ажыццяўленні гэтай ідэі аказала пісьменніцца з Мілашова Алена Масла, якая паспрыяла змястоўнай арганізацыі літаратурных вечарын. Кожная сустрэча адрознівалася сваёй тэматыкай і формай правядзення, аднак большасць з іх былі прысвечаны гісторыі і літаратуры Друі і ваколіц.

У суботу адбылася заключная вечарына на тэму “Літаратура памежжа: помнікі і асобы”. У першай частцы гістарычнага-экскурсу прысутныя даведаліся пра гісторыю рукапіснага літаратурнага помніка Друйскае евангелле, якое зараз знаходзіцца ў Нацыянальнай бібліятэцы Санкт-Пецярбурга. Кнігазнаўца, вядучая Радыё Марыя Таццяна Сапега, якая прыйшла на імпрэзу ў адмысловай цішотцы з выявай старонак Друйскага евангелля, распавяла пра спосабы вызначэння часу напісання кнігі і асаблівасці яе структуры. Удзельнікі вечарыны змаглі пазнаёміцца з фотакопіямі асобных яе старонак, якія прадставіла выступоўца.

У антракце, перад наступным дакладчыкам, слова ўзяў Сяргей Плыткевіч — заснавальнік інфармацыйнага партала planetabelarus.by, дырэктар краязнаўчага выдавецтва "Рыфтур" і рэспубліканскага фонду развіцця турызму і падтрымкі дзікай прыроды "Планета без межаў". Фатограф, які ўдзельнічае ў пленэры ў Друі ўжо не першы раз, пазнаёміў прысутных са сваім праектам і новымі ілюстрацыйнымі выданнямі, а таксама падараваў календары серыі "Дзікая прырода Беларусі" ўсім удзельнікам пленэру.

Пра творчасць пісьменнікаў мясцовага паходжання Ільдэфонса Бобіча (Пётра Просты) і Рышарда Курыльчыка распавяла кандыдат філалагічных навук Алена Карп. Навукоўца заўважыла, што для яе стаў нечаканым той факт, што пра Ільдэфонса (Ільдэфанса) Бобіча, імя якога ў літаратуры напаўзабытае і нячаста згадваецца, добра ведаюць і памятаюць у Друі. У касцёле ёсць мемарыяльная дошка ў гонар святара, а сваякі пісьменніка прадставілі для дэманстрацыі фотаматэрыялы з сямейных альбомаў, а таксама кнігу казанняў Ільдэфонса Бобіча, выдадзеную ў Львове ў 1937 годзе, дзе захаваліся аркушы брашуры з нататкамі святара.

Вечарына прайшла ў цёплай і адкрытай атмасферы. Выступленні кнігазнаўцаў дапоўнілі музычныя кампазіцыі ў выкананні квартэта друйскіх і міёрскіх музыкаў Ганны Гайдзель, Валянціны Казакевіч, Віялеты Томкі і Таццяны Званскай. У выкананні скрыпкі, флейты, клавішаў, а часам і віяланчэлі, гучала музыка Баха, Бетховена, Моцарта, Вівальдзі. Дарэчы, квартэт упрыгожваў творамі класічных аўтараў і іншыя літаратурныя вечары ў рамках пленэру.

Завяршыўся пленэр вернісажам, на якім мастакі падзяліліся вынікамі сваёй творчай працы. Усе карціны заслугоўваюць увагі і знайшлі свайго гледача. Сапраўдныя шэдэўры пастаянных удзельнікаў пленэру Кацярыны Сумаравай, Маі Пейхвасэр, Юрыя Немагая заахвочвалі спыніцца і задумацца. Манахромныя працы Уладзіміра Кандрусевіча захаплялі тэхнікай пісьма і глыбінёй сюжэта, а фотакарціны Марыны Бацюковай паказалі незвычайны погляд на рэчаіснасць праз аб'ектыў і мастацкую апрацоўку здымкаў.

Сёлета да пленэру далучылася шэраг мастакоў, якія нарадзіліся або жывуць недалёка каля Друі. Маляванкі Юліі Шакель, жывапіс Інгі Карашкевіч і Аліны Трукан прыцягвалі вока гледачоў.

Як заўсёды поруч са знакамітымі майстрамі працавалі тыя, хто яшчэ толькі спрабуе сябе ў мастацтве і праз сваё бачанне свету шукае асабісты стыль пісьма. Заслугоўваюць увагі работы маладых мастакоў Марыйкі Сумаравай і Марыны Рудчык. Іх работы — гэта запрашэнне да ціхага разважання і пошуку гармоніі ў паўсядзённасці.

Пленэр у Друі ў чарговы раз паказаў, што творчыя людзі — мастакі, музыканты і літаратары могуць і ўмеюць працаваць разам, дзелячыся сваім талентам, які атрымалі ад Бога, з тымі, хто жадае да яго далучыцца.

Жанна Закрэўская

09.08.2026