Калі ў Мёры прыехаў працаваць ксёндз Уладас Пятрайціс і пачуў гісторыю помніка, адразу загарэўся ідэяй устанавіць новую фігуру. Краязнаўца Вітольд Ермалёнак узгадвае: "У 1997 годзе да мяне звярнуўся кс.Уладас з просьбай дапамагчы высветліць, як выглядала ранейшая фігура Маці Божай, бо знайсці фотаздымак на той час не ўдалося. Я не мясцовы, таму пачаў распытваць людзей. І якая цікавая рэч — людская памяць... Большасць старажылаў дакладна не памяталі, як выглядаў помнік, усе апісвалі яго па-рознаму. Таму было прынята рашэнне зрабіць такую скульптуру, якую прапануе майстар Ігар Голубеў."
Працы зацягнуліся амаль на два гады. Адна з прычын — цяжкасці з разлікам. Парафіяне ахвяравалі грошы, але кошт помніка пастаянна ўзрастаў, бо была моцная інфляцыя. Адлівалі фігуру з бронзы на Мінскім трактарным заводзе. У верасні 1999 года скульптура Маці Божай масай 3 тоны і вышынёй 4,3 метры нарэшце прыбыла ў Мёры.