Юбілейныя святыні — брамы надзеі

Парафіяльныя аб'явы Літургічны каляндар Катэхеза Кантакты Відэаматэрыялы

Юбілейныя святыні — брамы надзеі

24 снежня 2024 года адкрыццём Святых дзвярэй у базыліцы святога Пятра Папа Францішак распачаў святкаванне Юбілею Святога 2025 года, які праходзіць у Каталіцкім Касцёле пад дэвізам «Пілігрымы надзеі». За наведванне юбілейных святынь, пры выкананні пэўных умоў, вернікі могуць атрымаць поўны адпуст.

У адказ на абвяшчэнне Папам Францішкам Звычайнага Юбілею Святога 2025 года, мясцовыя біскупы мелі права прызначыць на час Святога Года юбілейныя святыні, якія стануць для вернікаў месцам пабожнай пілігрымкі, у якіх праз сакрамант пакаяння, праз падмацаванне святой Камуніяй і малітву ў інтэнцыях Святога Айца са скарбніцы Касцёла можна атрымаць поўны адпуст, прабачэнне і адпушчэнне сваіх грахоў, які таксама можна ахвяраваць за душы, якія церпяць у чысцы.

Згодна з Дэкрэтам бікупа Віцебскага Алега Буткевіча ў Віцебскай дыяцэзіі юбілейнымі святынямі з 29 снежня 2024г. па 28 снежня 2025 г. прызначаны 8 касцёлаў, два з іх размешчаны ў суседніх раёнах: малая базыліка Нараджэння Маці Божай у Браславе і касцёл Нараджэння Маці Божай у Верхнядзвінску. У Дэкрэце біскуп Алег заахвочвае вернікаў здзяйсняць пілігрымкі да Юбілейных Святынь – “святых месц гасціннасці і прывілеяваных прастораў надзеі” (Spes non confundit, 24).

Першым месцам майго ўласнага пілігрымавання стала малая базыліка Нараджэння Маці Божай у Браславе. Па традыцыі яшчэ ў святочным убранні базыліка сустракала сваіх пілігрымаў. Памятны знак пры ўваходзе ў святыню пацвярджае яе статус. У канфесіянале чакалі пенітэнтаў. Нядзельная Эўхарыстыя сабрала шмат парафіянаў і гасцей. Пасля Літургіі была магчымасць індывідуальнай малітвы ля абраза Маці Божай Валадаркі Азёраў і ля імправізаваных ясляў.

У буле аб абвяшчэнні Юбілею Святога 2025 года, Папа Францішак пажадаў, каб Святы Юбілей усяліў надзею ва ўсіх. «Для ўсіх, асабліва для найбольш расчараваных, хто глядзіць у будучыню са скептыцызмам і песімізмам, няхай Святы год стане магчымасцю адрадзіць надзею, а таксама цноту цярплівасці, якая сёння, здаецца, выцясняецца спешкай», — адзначыў ён, заклікаўшы бачыць надзею ў знаках часу і не паддавацца спакусе думаць, што нас перамагае зло і насілле: дабро ёсць у свеце, і яго вельмі шмат.

Юбілейны год толькі распачаўся, таму заахвочваем вернікаў скарыстацца вялікай ласкай Касцёла і наведаць юбілейныя святыні.

Жанна Закрэўская,
19.01.2025