Святар у дом Бог у дом. Калядныя адведзіны сем'яў
Пасля свята Божага Нараджэння пачынаецца час душпастырскіх візітаў, або так званая каляда. Святары наведваюць сваіх парафіян, каб супольна памаліцца, блаславіць вернікаў і іх сем’і, асвяціць дамы. Каляда – гэта, перш за ўсё, сустрэча святара са сваёй паствай, добрая нагода для таго, каб бліжэй пазнаёміцца з парафіянамі, даведацца, як і чым яны жывуць. Для веруючага чалавека каляда мае важнае духоўнае значэнне, таму варта годна падрыхтавацца да душпастырскага візіту.
Як запрасіць святара і калі яго чакаць?

У нашай парафіі ў гэтым годзе душпастырскія адведзіны праводзяцца толькі па папярэднім запісе. Запіс ужо завяршыўся, але калі хто не паспеў запісацца, можна зрабіць гэта ў сакрыстыі. У адпаведнасці з запісанымі адрасамі святары вызначаюць дзень і час наведвання пэўнай вуліцы або вёскі. Парадак наведвання на працягу тыдня можна знасці на нашым сайце або на дошцы аб'яў у святыні. Калі па ўважлівых прычынах няма магчымасці прыняць святара ў вызначаны час, неабходна загадзя аб гэтым паведаміць.

Як падрыхтавацца да прыходу святара?

Неабходна прыбраць у доме. У пакоі, дзе будзем прымаць святара (пажадана не на кухні), засцілаем стол белым абрусам.  На стол ставім крыж і дзве свечкі. Таксама, калі ёсць, можна паставіць асвячоную ваду і палажыць крапіла. Калі ў доме ёсць рэлігійныя рэчы, якія неабходна блаславіць, іх таксама можна пакласці на стол.

Хто павінен прысутнічаць падчас візіту?

Адзначаючы, што каляда — гэта душпастырскае наведванне сем'яў, найлепш сустракаць святара ўсёй сям'ёй. Нават калі ў сям'і ёсць людзі іншага веравызнання або няверуючыя, пажадана каб і яны прысутнічалі падчас візіту.

Як апранацца?

Ксяндза варта сустракаць так, як вы сустракаеце сваіх дарагіх гасцей падчас важных жыццёвых падзей. Таму апрануцца трэба годна і сціпла, паколькі гэта таксама з’яўляецца выражэннем уласнай культуры паводзін.

Як сябе паводзіць?

Падчас візіту святара неабходна выключыць тэлевізар, радыё і гук мабільных тэлефонаў. Гаспадар або гаспадыня выходзяць насустрач ксяндзу, а астатнія члены сям'і чакаюць ў пакоі. На хрысціянскае прывітанне “Хвала Хрысту!” адказваем “На векі вечныя. Амэн”. Затым разам прымаем удзел у супольнай малітве. Калі святар акрапляе жыхароў дома святой вадой, робім знак крыжа.

Што можна і чаго непажадана рабіць?

Пасля асвячэння дома можна задаць святару пытанні, якія хвалююць сям'ю, прапанаваць гарбату або абед, аднак настойваць не варта. Падчас каляды не прадугледжана ўдзяленне сакрамантаў споведзі і намашчэння хворых. Аднак калі неабходнасць такая ўсё ж існуе, то лепш аб гэтым паведаміць загадзя.

Колькі даваць грошы?

У касцёле ніхто не выстаўляе цэнніка за паслугі святара і не называе канкрэтнага кошту, на які чалавек павінен арыентавацца. Таму адказ просты: хто колькі можа. Трэба падкрэсліць, што гэта менавіта ахвяра, дабравольны жэст, а не аплата за “працу” святароў. Атрыманыя сродкі пойдуць на патрэбы парафіі: рамонтныя працы, аплату за электрычнасць, арганізацыю сустрэч, пілігрымак ды інш. Толькі невялікая частка ахвяраванняў будзе прызначана асабіста для святароў.

“Працэдура” ўсоўвання грошай у кішэню ці сумку святара не заўсёды прыемная. Таму трэба загадзя ўкласці ахвяраванне ў чысты канверт і ў канцы душпастырскага візіту падаць яго ксяндзу са словамі, што гэта ахвяраванне на касцёл. Варта складваць ахвяраванне ад сэрца, памятаючы, што радаснага даўцу любіць Бог.
Паводле матэрыялаў каталіцкіх сайтаў
Адрас для карэспандэнцыі:

вул. Паштовая, д.11,
211287 г. Міёры
Віцебская вобласць
Тэлефон: +375 (2152) 41836
е-mail:
kascelmery@gmail.com
Выкарыстанне матэрыялаў дазваляецца пры ўмове спасылкі (гiперспасылкi) на kascelmery.by
Рыма-каталіцкая парафія Унебаўзяцця Найсвяцейшай Панны Марыі