Ва ўрачыстасць Езуса Хрыста Валадара Сусвету тры міністранты нашай парафіі сталі лектарамі

Парафіяльныя аб'явы Літургічны каляндар Катэхеза Кантакты Відэаматэрыялы

Ва ўрачыстасць Езуса Хрыста Валадара Сусвету тры міністранты нашай парафіі сталі лектарамі

Гэты дзень для абраду пасвячэння ў лектары быў абраны нездарма. Па традыцыі, ва ўрачыстасць Пана Нашага Езуса Хрыста, Валадара Сусвету, мы ахінаем духоўнай і малітоўнай падтрымкай тых, хто рыхтуецца да святарства. У парафіях па ўсёй краіне праходзіць збор сродкаў на ўтрыманне духоўных семінарый.

У нашай краіне дзейнічае адна духоўная семінарыя — Міждыяцэзіяльная вышэйшая духоўная семінарыя ў Гродне. Яе студэнты сёння раз'ехаліся па парафіях Беларусі, каб расказаць вернікам аб сваёй навучальнай установе і выказаць словы ўдзячнасці за духоўную і матэрыяльную падтрымку.

Госцем нашай парафіі стаў клерык Антон Тышко з Глыбокага, які з 2018 года праходзіць фармацыю святара ў духоўнай семінарыі ў Гродне. Сёння ён студэнт 5 курса, на якім навучаецца пяць клерыкаў, сярод іх тры паходзяць з Гродзенскай дыяцэзіі, два — з Віцебскай. Клерык Антон расказаў, што духоўная семінарыя налічвае 30 студэнтаў, сярод іх 8 з Віцебскай дыяцэзіі, у тым ліку адзін — Ян Каскевіч — з мёрскай парафіі. Працэс падрыхтоўкі да святарства паводле новага Ratio Fundamentalis Institutionis Sacerdotalis ад 8 снежня 2016 года працягваецца сем гадоў. Ён уключае інтэгральную фармацыю: чалавечую, духоўную, інтэлектуальную і пастаральную. Семінарыя не атрымлівае фінансавай дапамогі з боку дзяржавы, паколькі гэта касцёльная ўстанова для выхавання пастыраў для Божага люду. Яна існуе дзякуючы ахвяраванням.

Клерык Антон Тышко зачытаў Ліст ад супольнасці Міждыяцэзіяльнай вышэйшай духоўнай семінарыі ў Гродне на ўрачыстасць Хрыста Валадара і далучыўся да слоў удзячнасці вернікам за духоўную і матэрыяльную падтрымку.

Пасля літургіі слова адбыўся абрад удзялення паслугі лектара. Лектар – гэта пэўная ступень у служэнні ля алтара. Той, хто жадае служыць Пану асаблівым чынам, знаходзячыся блізка ля алтара, праходзіць пэўныя ступені. Спачатку гэта аспірант – асоба, якая рыхтуецца стаць міністрантам. Ён не выконвае ніякіх функцый, а толькі назірае і вучыцца.

Наступная ступень — міністрант — гэта хлапчук або юнак, які прыслужвае святару ў ходзе імшальнай літургіі. Слова ministrant у перакладзе з лацінскай мовы азначае «той, хто служыць, прыслужвае», а значыць, міністрант — гэта той, хто дапамагае святару пры цэлебрацыі літургіі.

Міністрант можа стаць лектарам. Лектар — гэта служэнне ў Каталіцкім Касцёле з абавязковым чытаннем у ходзе святой Імшы і іншых набажэнстваў Святога Пісання, за выключэннем Евагелля. Ён можа таксама прамаўляць інтэнцыі агульнай малітвы (малітвы вернікаў), а калі адсутнічае псальміст, спяваць або прамаўляць паміж чытаннямі псальмаў. Таксама падчас цэлебрацыі святой Імшы лектар мае ўласныя абавязкі, якія павінен выконваць сам.

Пасвячэнне ў лектары атрымалі тры юнакі з нашай парафіі: Максім Цыцын, Артур Курдутаў і Уладзіслаў Кунцэвіч, якія некалькі гадоў прыслугоўваюць ля алтара ў якасці міністрантаў. Трымаючы ў руках сваё новае літургічнае адзенне лектара — белую альбу, цынгулум (вяроўка), якім падпярэзваюць альбу на сцёгнах і гумерал, які прыкрывае свецкае адзенне вакол шыі, — з хваляваннем і радасцю прынялі абрад пасвячэння.

Распачаўся абрад супольнай малітвай, а потым, стоячы на каленях і паклаўшы правую руку на Евангелле, юнакі па чарзе склалі прысягу лектара. На заканчэнне абраду, ксёндз Алег Зямчонак акрапіў святой вадой літургічнае адзенне, якое лектары апранулі для далейшага служэння ля алтара на хвалу Пана.

Напрыканцы Імшы пробашч парафіі ксёндз Андрэй Кулік павіншаваў юнакоў, якія прынялі абрад пасвячэння ў лектары, з важнай для іх і парафіяльнай супольнасці падзеяй. Святар выказаў словы ўдзячнасці за іх служэнне ля алтара. Ксёндз Андрэй адзначыў, што паслуга лектара — гэта ганаровая і адказная справа, якая патрабуе ад кандыдатаў пэўных высілкаў і намаганняў, таму пажадаў ім Божай апекі ў далейшым служэнні.

На памяць аб удзяленні паслугі лектара ксёндз Алег Зямчонак уручыў міністрантам пасведчанні. Завяршылася ўрачыстая падзея агульным фотаздымкам міністрантаў, якія прысутнічалі на святой Імшы.

У нашай парафіі на сённяшні дзень да службы алтара належаць 16 хлопчыкаў і юнакоў, якія выконваюць абавязкі міністрантаў. Кожную суботу а 15-ай гадзіне ксёндз Алег Зямчонак праводзіць для іх заняткі, на якіх аспіранты і міністранты вывучаюць Святое Пісанне, больш падрабязна знаёмяцца з этапамі Літургіі і іх значэннем, вучацца выконваць пэўныя абавязкі. Міністрантам можа стаць любы практыкуючы каталіцкую веру хлопец або дарослы мужчына, які мае жаданне служыць Пану ля алтара. Па ўсіх пытаннях можна звяртацца да святароў.

Жанна Закрэўская

26.11.2023