Сакрамант хросту і абрад увядзення ў лектары

Парафіяльныя аб'явы Літургічны каляндар Катэхеза Кантакты Відэаматэрыялы

Сакрамант хросту і абрад увядзення ў лектары

24 лістапада — ва ўрачыстасць Пана Нашага Езуса Хрыста, Валадара Сусвету, на святой Імшы а 10-ай гадзіне адбыліся дзве знамянальныя падзеі. Ксёндз Алег Зямчонак удзяліў сакрамант хросту маленькай дзяўчынцы, а таксама здзейсніў абрад увядзення да паслугі лектара.

Па традыцыі, ва ўрачыстасць Пана Нашага Езуса Хрыста, Валадара Сусвету, мы ахінаем духоўнай і малітоўнай падтрымкай тых, хто рыхтуецца да святарства. У парафіях праходзіць збор сродкаў на ўтрыманне духоўных семінарый. У гэты дзень таксама асаблівым чынам моляцца за міністрантаў, якія служаць пры алтары.

Падчас Эўхарыстыі шэсць міністрантаў нашай парафіі: Андрэй Малецкі, Уладыслаў Бялевіч, Раман Чарняўскі, Мацвей Дарожка, Павел Сінкевіч і Уладыслаў Дзівін прынялі абрад увядзення да паслугі лектара.

Лектар — гэта служэнне ў Каталіцкім Касцёле з абавязковым чытаннем у ходзе святой Імшы і іншых набажэнстваў Святога Пісання, за выключэннем Евагелля. Ён можа таксама прамаўляць інтэнцыі агульнай малітвы (малітвы вернікаў), а калі адсутнічае псальміст, спяваць або прамаўляць паміж чытаннямі псальмаў. Таксама падчас цэлебрацыі святой Імшы лектар мае ўласныя абавязкі, якія павінен выконваць сам.

Быць лектарам — адказная і ганаровая справа. Паслуга лектара даручаецца тым міністрантам, якія дасягнулі пэўнага ўзросту і на працягу некалькіх гадоў станоўча праявілі сябе ў служэнні ля алтара.

Абраду пасвячэння папярэднічала падрыхтоўка. Хлопцы рэгулярна наведвалі заняткі для міністрантаў і паспяхова здалі адмысловы экзамен.

Трымаючы ў руках сваё новае літургічнае адзенне лектара — белую альбу, цынгулум (вяроўка), якім падпярэзваюць альбу на сцёгнах і гумерал, які прыкрывае свецкае адзенне вакол шыі, — з хваляваннем і радасцю чакалі міністранты адказнага моманту.

Абрад распачаўся з уступнай малітвы, пасля чаго ксёндз Алег Зямчонак, адказны ў парафіі за фармацыю міністрантаў, акрапіў святой вадой літургічнае адзенне, якое лектары будуць апранаць падчас Эўхарыстыі. Затым, стоячы на каленях і паклаўшы правую руку на Евангелле, юнакі па чарзе склалі прысягу лектара.

Пасля святой Імшы, на памяць аб удзяленні паслугі лектара, ксёндз Алег уручыў міністрантам пасведчанні.

Падчас Эўхарыстыі да нашай парафіяльнай супольнасці далучылася маленькае дзіця, якому быў удзелены сакрамант Хросту. Святы хрост ёсць фундаментам усяго хрысціянскага жыцця, брамай жыцця ў Духу і брамай, якая адчыняе доступ да іншых сакрамантаў.

Маем надзею, што падзеі, якія адбыліся ў апошнюю нядзелю літургічнага года, паспрыяюць далейшаму развіццю нашай парафіяльнай супольнасці.

Нагадваем, што міністрантам можа стаць любы практыкуючы каталіцкую веру хлопец або дарослы мужчына, які мае жаданне служыць Пану ля алтара. Па ўсіх пытаннях можна звяртацца да святароў.

Жанна Закрэўская

24.11.2024