Сёння Люрд – гэта найбуйнейшы ў Францыі і адзін з найбуйнейшых асяродкаў Марыйнага культу ў свеце. У гэтым месцы людзі атрымоўваюць фізічнае і духоўнае аздараўленне. Таму Люрд – гэта мэта шматлікіх пілігрымак розных людзей з розных частак зямлі. Кожны год санктуарый наведвае каля 6 мільёнаў чалавек з усяго свету з надзеяй вылечыцца ад хваробы. Найчасцей людзі шукаюць здароўя цела, але не толькі — яны таксама шукаюць здароўя душы.
У Люрдзе пануе своесаблівая атмасфера. Гэта адчуваецца праз добразычлівыя адносіны, ўсмешкі незнаёмых людзей пры сустрэчы, узаемадапамогу. Я мела магчымасць двойчы пабываць у гэтым святым месцы, дзе мяне найбольш уразіла пабожная традыцыя Ружанцовай малітвы на заканчэнне дня, падчас якой адбываецца ўрачыстая працэсія. Валанцёры нясуць вялікую фігуру Маці Божай уздоўж тэрыторыі экспланады (адкрытая пляцоўка перад санктуарыем, заўв. аўт.), вернікі ж, трымаючы ў адной руцэ свечку, а ў другой ружанец, нястомна паўтараюць словы малітвы. Ідучы ў працэсіі чуеш побач словы "Вітай, Марыя..." на англійскай, французскай, польскай і іншых мовах і сам паўтараеш па-беларуску. Пасля кожнай таямніцы гучыць песня "Аve Maria", зноў жа на розных мовах. Рэфрэн "Аve, Аve, Аve Maria!" падхоплівае ўся шматтысячная супольнасць, пры гэтам усе разам падымаюць запаленыя свечкі ўгору.
