Памаліліся за памерлых

Парафіяльныя аб'явы Літургічны каляндар Катэхеза Кантакты Відэаматэрыялы

Памаліліся за памерлых

Лістапад — гэта не проста чарговы месяц у календары. Гэта час асаблівага роздуму і памяці пра нашых памерлых. Пачынаючы з урачыстасці Усіх Святых, праз успамін усіх памерлых вернікаў і далей на працягу месяца мы молімся за тых, хто адыйшоў у вечнасць. З гэтай нагоды 4 лістапада адбыліся адмысловыя набажэнствы на гарадскіх могілках.

А 10-ай гадзіне распачалася супольная малітва за памерлых на старых парафіяльных могілках. Сабраўшыся каля магілы былога пастыра ксяндза Яна Грабоўскага вернікі на чале з вікарыем кс.Алегам Зямчонкам памаліліся на ружанцы за святароў, бацькоў, родных і блізкіх, настаўнікаў і дабрадзеяў, а таксама за ахвяраў войнаў і душы памерлых, аб якіх ніхто не моліцца. Звяртаючыся да прысутных ксёндз Алег падкрэсліў, што наведваючы могілкі, мы ўзгадваем нашых блізкіх памерлых: бацькоў, родных і знаёмых. Часам у нашым сэрцы жыве крыўда, але мы, захоўваючы ў памяці цёплыя і дарагія моманты, павінны імкнуцца прабачыць і ачысціць сваё сэрца, каб наша малітва мела плён для тых, хто адышоў у вечнасць.

А 12-ай гадзіне адбылася святая Імша ў капліцы на новых парафіяльных могілках. Пробашч парафіі кс.Андрэй Кулік адзначыў, што вера ва ўваскрашэнне памерлых і вечнае жыццё патрабуе ад нас з пашанаю пахаваць нашых памерлых і памятаць пра іх у малітве. Катэхізіс Каталіцкага Касцёла навучае, што адным з учынкаў міласэрнасці для душы бліжняга з'яўляецца малітва за жывых і памерлых, таму мы павінны нястомна маліцца, выпрошваючы ласку збаўлення для душ, якія церпяць у чыстцы.

Пасля Эўхарыстыі адбылася адмысловая супольная малітва за памерлых. Завяршылася набажэнства асвячэннем магіл і новых помнікаў.

Жанна Закрэўская