Ва Успамін усіх памерлых вернікаў прайшлі набажэнствы на могілках

Парафіяльныя аб'явы Літургічны каляндар Катэхеза Кантакты Відэаматэрыялы

Ва Успамін усіх памерлых вернікаў прайшлі набажэнствы на могілках

2 лістапада ў літургічным календары Каталіцкага Касцёла адзначаецца Успамін усіх памерлых вернікаў або Задушны дзень, калі мы асаблівым чынам узгадваем тых, хто адышоў у вечнасць. З гэтай нагоды на гарадскіх могілках адбыліся адмысловыя набажэнствы за памерлых.

А 10-ай гадзіне распачалася супольная малітва за памерлых на старых парафіяльных могілках. Сабраўшыся каля магілы былога пробашча нашай парафіі ксяндза Яна Грабоўскага, вернікі на чале з вікарыем ксяндзом Алегам Зямчонкам памаліліся на ружанцы за святароў, бацькоў, родных і блізкіх, настаўнікаў і дабрадзеяў, а таксама за ахвяраў войнаў і душы памерлых, аб якіх ніхто не моліцца. Звяртаючыся да прысутных ксёндз Алег падкрэсліў, што наведваючы могілкі, мы ахінаем сваёй малітоўнай апекай тых, хто адыйшоў у вечнасць. Вельмі важна, каб мы дакрануліся да іх агнём сваёй любові, які атрымоўваем праз сакрамант святой споведзі і сакрамант Эўхарыстыі. А таксама зрабілі ўсё магчымае, каб у часе актавы Усіх Святых, прыняць Пана Езуса ў свае сэрцы ў інтэнцыі памерлых родных і блізкіх і атрымаць адпуст для іх душаў.

А 12-ай гадзіне адбылася святая Імша ў капліцы на новых парафіяльных могілках. Пробашч парафіі ксёндз Андрэй Кулік адзначыў, што на супольную малітву нас сабрала вера ў жыццё вечнае і еднасць святых. Кожны чалавек дапускае грахі і правіны, аднак усе мы спадзяемся на Божую міласэрнасць для нашых блізкіх, а таксама для нас саміх. Мы разлічваем на тое, што Бог дасць нам мудра выкарыстаць час зямнога жыцця, каб заслужыць валадарства жыцця вечнага ў небе. Сёння, думаючы пра нашых блізкіх памерлых, хочам перапрашаць Пана Бога за нашыя грахі, каб наша малітва за іх прынесла плён.

Кожны дзень, з'яўляецца для нас сапраўдным Божым дарам, які Ён прапаноўвае, каб мы зрабілі шмат дабра іншым людзям і праз гэта заслужылі вечнае жыццё.

Ксёндз Андрэй заклікаў заўсёды знаходзіць час на памерлых, бо іх жыццё на зямлі скончылася, а наша — працягваецца і мы можам ім дапамагчы. "Няхай сярод нашых шматлікіх абавязкаў і штодзённых клопатаў будзе час на памяць і малітву ў інтэнцыі тых, хто адыйшоў у вечнасць" — пажадаў святар.

Пасля Эўхарыстыі адбылася адмысловая супольная малітва за памерлых.

Завяршылася набажэнства асвячэннем магіл і новых помнікаў.

Жанна Закрэўская