WYSIWYG Web Builder
На могілках прайшлі набажэнствы з нагоды ўспаміну ўсіх памерлых вернікаў
31 кастрычніка, напярэдадні ўрачыстасці Усіх Святых, у нашай парафіі адбыліся адмысловыя набажэнствы на могілках. Супольная малітва за памерлых — гэта адказ на заклік Каталіцкага Касцёла аб захаванні памяці пра душы спачылых.
А 10-ай гадзіне распачалася супольная малітва за памерлых на старых парафіяльных могілках. Сабраўшыся традыцыйна ля магілы былога пробашча нашай парафіі ксяндза Яна Грабоўскага, вернікі на чале з пробашчам ксяндзом Андрэем Куліком памаліліся на ружанцы за святароў, бацькоў, родных і блізкіх, настаўнікаў і дабрадзеяў, а таксама за ахвяраў войнаў і душы памерлых, аб якіх ніхто не моліцца. На пачатку набажэнства, звяртаючыся да прысутных, ксёндз Андрэй падкрэсліў, што мы наведваем могілкі, каб памаліцца за душы нашых родных і блізкіх, якія прабываюць у вечнасці. Ля магілы ксяндза Яна Грабоўскага мы молімся за ўсіх памерлых святароў, што ўдзялялі нам сакраманты, навучалі Божаму слову і праўдам веры. У сваёй малітве ўзгадваем бацькоў, бабуль, дзядуль, нашых суседзяў, родных і знаёмых, якія ў складаныя часы ваяўнічага атэізму захавалі веру і перадалі яе нам. Божай Міласэрнасці давяраем усіх, хто адышоў у вечнасць без прыняцця сакрамантаў, за ахвяраў розных катаклізмаў і войнаў, асабліва за нявінна загінуўшых.
Завяршылася набажэнства асвячэннем магіл і новых помнікаў.


Ва ўрачыстасць Усіх Святых і ўспамін усіх памерлых вернікаў можна атрымаць поўны адпуст і ахвяраваць яго за душы, якія пакутуюць у чыстцы. Для гэтага трэба прыняць удзел у святой Імшы, быць у стане асвячальнай ласкі і прыняць святую Камунію, памаліцца «Ойча наш» і «Веру ў Бога», а таксама памаліцца ў інтэнцыях Святога Айца. Адпуст можна ахвяраваць за душу аднаго памерлага: адзін дзень — адзін адпуст. З 1 па 8 лістапада можна атрымаць поўны адпуст за наведванне могілак, выканаўшы таксама вышэй згаданыя ўмовы.


Жанна Закрэўская

31.10.2026
Рымска-каталіцкая парафія Унебаўзяцця Найсвяцейшай Панны Марыі
Адрас для карэспандэнцыі:

вул. Паштовая, д.11,
211287 г. Міёры
Віцебская вобласць
Тэлефон: +375 (2152) 41836
е-mail:
kascelmery@gmail.com
Выкарыстанне матэрыялаў дазваляецца пры ўмове спасылкі (гiперспасылкi) на kascelmery.by