Час - гэта найбольшая каштоўнасць...
Першага студзеня ў апошні дзень актавы Божага Нараджэння Касцёл адзначае ўрачыстасць Багародзіцы Марыі. Эфескі сабор у 431 годзе абвясціў, што Дзеву Марыю можна і нават належыць называць Багародзіцай. Такая была рэакцыя Касцёла на погляды, што Хрыстус не з’яўляецца адначасова Богам і Чалавекам.
У гэты дзень Касцёл заахвочвае, каб кожны з нас выкарыстаў магчымасць даверыць сябе і сваіх блізкіх апецы Маці Божай у першы дзень Новага года.
На святой Імшы а 12 гадзіне, падчас сваёй гаміліі ксёндз-пробашч Андрэй Кулік запрасіў прысутных задумацца над тым, якой важнай каштоўнасцю для кожнага з нас з'яўляецца час. "...Мы не павінны губляць час на серыялы, малаважныя і бессэнсоўныя справы. ...Бог кожнаму з нас даў талент і хоча каб мы яго памнажалі. Дарагі брат і сястра, не трэба марнаваць тое, што Бог даў табе. Аднак рэалізуйся і будзь шчаслівы праз тое, што ты на сваім месцы прыносіш карысць грамадству, сваёй сям'і, парафіі..."
