У свята Святой Сям'і дзеці нашай парафіі атрымалі падарункі

Парафіяльныя аб'явы Літургічны каляндар Катэхеза Кантакты Відэаматэрыялы

У свята Святой Сям'і дзеці нашай парафіі атрымалі падарункі

29 снежня ў свята Святой Сям'і пасля святой Імшы а 10-ай гадзіне пробашч парафіі ксёндз Андрэй Кулік уручыў дыпломы і падарункі ўдзельнікам мастацкага конкурсу, які быў прысвечаны срэбнаму юбілею Віцебскай дыяцэзіі. Падарункі таксама атрымалі дзеці, якія наведваюць катэхезу, міністранты і ўдзельнікі дзіцячага хору.

Мастацкі конкурс да юбілею Віцебскай дыяцэзіі праводзіўся ў кастрычніку-лістападзе. Мэтамі і задачамі яго былі: знаёмства з гісторыяй Віцебскай дыяцэзіі, умацаванне хрысціянскіх традыцый і духоўна-маральных каштоўнасцей, а таксама стварэнне ўмоў для рэалізацыі творчага патэнцыялу дзяцей, моладзі і дарослых. Вынікі конкурсу былі падведзены 10 лістапада ў Віцебскай катэдры.

На конкурс у трох узроставых катэгорыях (6-12 гадоў, 13-17 гадоў і 18+) было пададзена 97 прац. Сярод пераможцаў конкусу ёсць таксама і наша парафіянка — Сафія Баран, якая адзначана дыпломам ІІІ ступені ва ўзроставай катэгорыі 13-17 гадоў. Сафія прыняла ўдзел у цырымоніі ўзнагароджвання ў катэдры і атрымала дыплом і падарункі з рук біскупа Віцебскага Алега Буткевіча.

Усяго з нашай парафіі на конкурс было накіравана 18 малюнкаў. Дапамогу ў падрыхтоўцы канкурсантаў аказала Міёрская дзіцячая школа мастацтваў. Перад узнагароджваннем удзельнікаў конкурсу, пробашч парафіі ксёндз Андрэй Кулік выказаў словы ўдзячнасці Чарняўскаму Баляславу Часлававічу за плённае супрацоўніцтва і аказанне дапамогі пры арганізацыі мастацкіх выстаў і конкурсаў.

Як потым расказаў нашаму сайту Баляслаў Часлававіч, падрыхтоўка да конкурсу 25-годдзя Віцебскай дыяцэзіі — гэта калектыўная спава, якую падтрымалі яго калегі. Удзельнікаў конкурсу, акрамя Баляслава Часлававіча, рыхтавалі: Даргель Наталля Эдуардаўна, Чарняўская Вольга Сямёнаўна і Бурштэйн Анастасія Міхайлаўна. Усе педагогі ўпэўеныя, што ўдзел у конкурсах дае дзецям пэўны вопыт, які садзейнічае развіццю іх мастакага таленту і спрыяе творчаму росту.

Пробашч парафіі ксёндз Андрэй Кулік уручыў дзецям дыпломы, а таксама падарункі, спонсарамі якіх стаў Нацыянальны Карытас на чале з дырэктарам ксяндзом Андрэем Аніскевічам і мёрская парафія.

Потым падарункі з рук катэхеткі Наталлі Гарноўскай атрымалі дзеці, якія наведваюць заняткі па рэлігіі. Салодкія падарункі ўдзельнікам дзіцячага хору ўручыла арганістка Яўгенія Баговіч. Апошнімі, як самыя стрыманыя і дысцыплінаваныя, атрымалі падарункі міністранты. Усяго было ўручана 80 салодкіх падарункаў, спонсарам якіх стаў Карытас Віцебскай дыяцэзіі на чале з ксяндзом канонікам Віктарам Місевічам.

Уручаючы падарункі, пробашч парафіі ксёндз Андрэй Кулік падкрэсліў, што мы прыходзім у касцёл не дзеля падарункаў, а каб пачуць Слова Божае, прыступіць да стала Пана і ўмацавацца духоўна, таму падарункі не павінны быць для нас стымулам, а толькі маленькім сюрпрызам з нагоды свята Божага Нараджэння.

Завяршылася імпрэза агульным фотаздымкам.

Жанна Закрэўская

29.12.2024