Міёрскія вернікі падтрымалі парафію ў Задарожжы

Парафіяльныя аб'явы Літургічны каляндар Катэхеза Кантакты Відэаматэрыялы

Міёрскія вернікі падтрымалі парафію ў Задарожжы

27 ліпеня нашу святыню наведаў пробашч парафіі Маці Божай Ласкавай у Задарожжы ксёндз канонік Эдвард Нарадоўскі. Святар прамовіў гамілію, у ходзе якой распавёў пра гісторыю касцёла ў Задарожжы. Пасля кожнай Імшы ахвотныя вернікі складалі ахвяраванні на работы ў святыні.

Як адзначыў ксёндз Эдвард, першы драўляны касцёл Маці Божай Ласкавай у Задарожжы быў пабудаваны ў 1601 годзе каралём Рэчы Паспалітай Жыгімондам ІІІ у знак перамогі над войскамі Шведскага каралеўства. У 1733 годзе па прычыне спарахнеласці касцёл быў перабудаваны нанова.

У 1902 годзе ў Вялікую суботу драўляны храм згарэў. З улікам вялікай колькасці вернікаў гэтай парафіі (каля 5 тысяч чалавек), было прынята рашэнне ўзнавіць святыню. Усе арганізацыйныя і будаўнічыя работы ляглі на плечы тагачаснага пробашча ксяндза Антонія Валентыновіча. А для прыцягнення дадатковых сродкаў была выдадзена паштоўка з праектным малюнкам Задарожскага касцёла і заклікам да вернікаў ахвяраваць сродкі на яго ўзвядзенне.

Храм пабудавана згодна з праектам Віленскага архітэктара Антонія Філіповіча-Дубовіка, які, дарэчы, з'яўляецца аўтарам праекта нашай святыні. Урачыстае асвячэнне новага будынка касцёла ў Задарожжы адбылося ў 1910 годзе.

Задарожскі касцёл ніколі не зачыняўся, нават тады, калі рушылі храмы, ператваралі іх у клубы, збожжасховішчы. Люцыян Паўлік, ксёндз марыянін, які прыехаў служыць у Задарожскую парафію, пры падтрымцы парафіян, змог выратаваць ад разбурэння старэйшы ў Глыбоцкім раёне храм.

50 гадоў ён ахвярна служыў Пану Богу ў Задарожскім касцёле, выпрошваючы ласкі Божай для ўсіх людзей добрай волі. У дзень 90-годдзя з дня нараджэння Люцыяну Паўліку быў уручаны Залаты крыж Ватыкана. Такой узнагароды адзначаны лічаныя каталіцкія святары свету.

Удзячныя парафіяне ўстанавілі ў касцёле памятную дошку ў гонар святара.

З 2007 года пробашчам парафіі ў Задарожжы працуе ксёндз Эдвард Нарадоўскі, які 12 сакавіка 2024 года атрымаў тытул ганаровага каноніка Віцебскай дыяцэзіі. Душпастырская дзейнасць святара не адрозніваецца ад іншых: удзяленне сакрамантаў, катэхізацыя, клопат пра святыню. На жаль, як і ў большасці вёсак Віцебшчыны, насельніцтва скарачаецца. Сёння парафія налічвае каля 300 вернікаў.

Касцёл у Задарожжы адзначае два парафіяльня адпусты: Маці Божай Ласкавай і Унебаўзяцця Найсвяцейшай Панны Марыі.

Напрыканцы Імшы пробашч нашай парафіі ксёндз Андрэй Кулік падкрэсліў, што ўтрымліваць велічную святыню з невялікай колькасцю вернікаў становіцца ўсё больш складана і патрабуе дапамогі. Святар выказаў словы ўдзячнасці ўсім, хто адгукнуўся дапамагчы парафіі ў Задарожжы і склаў свае ахвяраванні.

Жанна Закрэўская, тэкст

Фота Catholicnews.by і з адкрытых крыніц

27.07.2025