Распачалася Імша. Зіхоткія ўсмешкі і ноткі хвалявання панавалі на тварах маленькіх вернікаў, якія чакалі сустрэчы з Езусам у Эўхарыстыі. Пробашч парафіі ксёндз Андрэй Кулік адзначыў важнасць падзеі, якую перажываем, для кожнага асабіста і для парафіяльнай супольнасці. "Нашы дзеці прымуць сёння чарговы сакрамант хрысціянскай сталасці — сакрамант Эўхарыстыі. Праз хрост мы далучыліся да супольнасці Касцёла, а Эўхарыстыя вядзе нас па дарозе да вечнага жыцця..." Звяртаючыся да дзяцей, святар заўважыў: "Белае адзенне, у якое вы сёння апранутыя, сімвалізуе чысціню вашай душы, імкніцеся не запляміць яе цяжкім грахом. Хай святло свечкі, якую вы трымаеце ў руках, асвятляе ваш шлях ў дарозе да Бога".
Пасля, трымаючы ў руках запаленыя ад пасхала свечкі, дзеці аднавілі абяцанні хросту. Завяршылася літургія слова малітвай вернікаў і прынашэннем дароў.
