Урачыстасць Першай Камуніі

Парафіяльныя аб'явы Літургічны каляндар Катэхеза Кантакты Відэаматэрыялы

Урачыстасць Першай Камуніі

У нядзелю 24 мая наша парафіяльная супольнасць перажывала цудоўную ўрачыстасць: 19 маленькіх вернікаў упершыню прыступілі да Эўхарыстычнага стала і прынялі да сваіх сэрцаў Цела Хрыста. Першая Камунія заўсёды важная, радасная і запамінальная падзея ў жыцці дзіцяці, яго сям’і і ўсёй парафіі.

Прыняцце Камуніі — Цела Хрыста — гэта ўсвядомлены крок у духоўнае жыццё, якому папярэднічае двухгадовая падрыхтоўка на занятках па катэхэзе. Напярэдадні Першай Камуніі праходзіць Першая споведзь, падчас якой дзіця павінна ўспомніць усе свае грахі, разабрацца з мінулым, каб прыйсці да новага жыцця з чыстай душой. Рахунак сумлення дапамагаюць выканаць бацькі. Разам з дзецьмі яны таксама даходзяць да споведзі і моляцца аб чысціні. Затым — прыняцце Першай Камуніі, пасля якой дзіця адкрывае сваю душу для Хрыста і падымаецца на новую прыступку ў сваёй духоўнай свядомасці.

У нядзелю, па-святочнаму апранутыя ў белыя альбы — сімвал чысціні і святасці, са свечкамі ў руках, дзеці, якія рыхтаваліся да прыняцця Першай Камуніі, разам з бацькамі чакалі святара ля ўваходу ў касцёл. Пробашч парафіі ксёндз Андрэй Кулік прывітаў маленькіх вернікаў і пасля таго, як іх блаславілі бацькі, запрасіў дзяцей у святыню на самую галоўную ў іх жыцці Імшу.

Падчас гаміліі пробашч парафіі ксёндз Андрэй Кулік звярнуўся да дзяцей і заклікаў іх запомніць гэты важны ў іх жыцці дзень. Прамоўца падкрэсліў, што мы, на жаль, не заўсёды памятаем дзень свайго хросту, які з'яўляецца пачаткам нашага рэлігійнага жыцця, але няхай гэты важны для вас дзень — дзень першай сустрэчы з Езусам Эўхарыстычным, запомніцца на ўсё жыццё.

Завяршаючы прамову, святар даў дзецям наказ: "Дзе бы вы не былі, куды б вас у будучым не прывяло жыццё, заўсёды шукайце Касцёл — супольнасць католікаў, якая збіраецца на нядзельную Эхарыстыю. Шукаючы разам з імі Хрыста, молячыся да Яго — вы не збочыце з жыццёвай дарогі. Жыццё ставіць перад намі розныя выпрабаванні. У першую чаргу выпрабоўвае нашу веру, нашу адданасць і вернасць Хрысту. Не згубіце гэты каштоўны дар."

Завяршылася літургія слова малітвай вернікаў і прынашэннем дароў.

Нарэшце доўгачаканы момант Эўхарыстыі. Заўсёды кранальна бачыць, як дзеці з руплівасцю і хваляваннем укленчваюць перад Хрыстом, утоеным у маленькай гостыі, углядаюцца ў Яго і з гучным "Амэн" прымаюць Яго да сябе.

Напрыканцы Імшы пробашч парафіі ксёндз Андрэй Кулік выказаў словы ўдзячнасці тым, хто рыхтаваў дзяцей да прыняцця Першай Камуніі: катэхетцы Наталлі Гарноўскай і ксяндзу Антонію Тышко, які праводзілі заняткі па рэлігіі адпаведна ў першы і другі год падрыхтоўкі. Святар падзякаваў усім, хто рыхтаваў і прыняў удзел ва ўрачыстасці, а таксама нагадаў, што дзяцей чакае "белы тыдзень" — актава ўрачыстасці, падчас якой дзеці кожны дзень у белым адзенні будуць хадзіць у касцёл і дзякаваць за дар святой Камуніі.

У сваю чаргу бацькі і дзеці выказалі ўдзячнасць за ўдзяленне сакраманту першай споведзі і Першай святой Камуніі ксяндзу Андрэю.

Завяршылася ўрачыстасць уручэннем памятак аб Першай святой Камуніі і агульным фотаздымкам.

Жанна Закрэўская

24.05.2026