Пілігрымка "Росіца-Будслаў 2025"

Парафіяльныя аб'явы Літургічны каляндар Катэхеза Кантакты Відэаматэрыялы

Пілігрымка "Росіца-Будслаў 2025"

27 чэрвеня з Росіцы вырушыла першая пешая пілігрымка з Віцебскай дыяцэзіі да Маці Божай Будслаўскай. Арганізатары васьмідзённай пілігрымкі айцы марыяне, а яе духоўным кіраўніком з'яўляецца айцец Аляксандр Жарнасек МІС з Росіцы. 28 чэрвеня наша парафія прымала да сябе пілігрымаў.

У складзе пілігрымкі вернікі з розных куточкаў Беларусі. Усе пілігрымы людзі невыпадковыя, бо адмовіўшыя ад выгод і ўзяўшы з сабой заплечнік і выпрабаванні шляху, ідуць яны да Маці Божай Будслаўскай, каб стаць сведкамі веры і скласці свае просьбы і падзякі да ног Багародзіцы. Пераважная большасць удзельнікаў — вопытныя пілігрымы. Многія з іх пераадольваюць шлях з Росіцы да Будслава не першы раз.

У гэтым годзе з Росіцы выйшла 20 пілігрымаў, сярод іх і наймалодшыя ўдзельніцы — адзінаццацігадовыя дзяўчаты з Мінска. Па дарозе пілігрымка паступова павялічваецца: тры чалавекі далучыліся ў Верхнядзвінску, яшчэ дванаццаць у Мёрах. У складзе пілігрымкі крочыць і восем нашых парафіянаў. Раман і Варвара Чарняўскія — пілігрымы ў трэцім пакаленні. Пад кіраўніцтвам ксяндза Уладаса Пятрайціса хадзілі ў пілігрымку "Мёры-Будслаў" іх бабуля і дзядуля, разам з сынамі Міхаілам і Аляксандрам, а сёння ўжо Міхаіл Чарняўскі дзеліцца сваім вопытам пілігрыма з сынам і пляменніцай.

Трэці дзень пілігрымкі распачаўся святой Імшой а 8-ай гадзіне. Эўхарыстыю ўзначаліў айцец Ілля Саўчанка МІС з Оршы. Напрыканцы святой Імшы святар выказаў словы ўдзячнасці пробашчу парафіі ксяндзу Андрэю Куліку і мёрскім парафіянам за гасцінны прыём.

Вядома, што прыём пілігрымаў, прадугледжвае пэўныя дадатковыя клопаты гаспадарам, але гэта не ідзе ў параўнанне з тым, што ты атрымоўваеш у маральным і духоўным плане. Знаёмства з новымі людзьмі і сведчанне іх веры дае стымул для ўласнага духоўнага росту. У гэтым годзе мне пашанцавала прымаць неардынарных і таленавітых людзей: Вольга славіць Пана сваімі цудоўнымі спевамі (дыск з песнямі, аўтарам якіх яна з'яўляецца, папоўніў цяпер маю фанатэку), а Валянціна, праз вырабленых сваімі рукамі анёлкаў, нясе ў свет вялікую праўду веры — Бог ёсць любоў.

Пасля святой Імшы пілігрымы, развітаўшыся з гаспадарамі парафіі, вырушылі ў далейшы шлях да наступнага месца начлегу ў Германавічах. Няблізкі шлях, моцны вецер і зменлівае надвор'е не перашкаджае ім славіць Пана Бога і Яго Маці спевамі і малітвамі.

Хай Божая любоў, як крыніца супакою, дае сілы пілігрымам паспяхова дасягнуць сваёй мэты і духоўна ўзбагаціца падчас шляху. Хай Пан Бог адорыць неабходнымі ласкамі ўсіх дабрадзеяў, якіх яны сустрэнуць падчас пілігрымавання.

Жанна Закрэўская

29.06.2025