Пілігрымка Друя-Росіца

Парафіяльныя аб'явы Літургічны каляндар Катэхеза Кантакты Відэаматэрыялы

Пілігрымка "Друя-Росіца"

Хутка адбудуцца жнівеньскія ўрачыстасці ў Росіцы – месцы мучаніцкай смерці бласлаўлёных айцоў марыянаў Юрыя Кашыры і Антонія Ляшчэвіча. У духоўны шлях да росіцкага санктуарыя сёлета вырушылі дзве пілігрымкі з Полацка і Друі. Шлях друйскай пілігрымкі, як заўсёды, ляжаў праз Мёры.

У гэтым годзе ў пілігрымцы "Друя-Росіца" бяруць удзел не толькі вернікі з розных куточкаў Беларусі, але таксама сястра Аўгустына ОР і яшчэ пяць вернікаў з Калінінграда, якія прыехалі каб здзейсніць сваё духоўнае падарожжа. Вядома, што пілігрымка — гэта рызыка, бо ніколі не ведаеш, што будзе, як будзе… Пілігрымка — гэта адкрыццё на іншага чалавека. На таго, які ідзе побач. На таго, які толькі што даў табе бутэльку з вадой. На таго, які ўсміхнуўся табе або не. Таго, які табе сімпатычны, і таго, які цябе па нейкай прычыне раздражняе.

Пілігрымка — гэта не проста шлях, гэта сведчанне веры ў Пана Бога і прыклад любові да бліжняга. Гэта таксама магчымасць перамяніць сябе, выйсці з "зоны камфорту", каб несці Хрыста тым, хто Яго патрабуе.

Мёрскія парафіяне чакалі пілігрымаў на цвінтары касцёла, каб гасцінна прыняць іх у свае дамы. Пробашч парафіі ксёндз Андрэй Кулік прывітаў пілігрымаў і акрапіў іх святой вадой. Пасля супольнай малітвы ў святыні, пілігрымы накіраваліся на адпачынак, каб на наступны дзень з новымі сіламі вырушыць у дарогу.

Жанна Закрэўская

29.07.2026