Прэзбітэрскія пасвячэнні ў Віцебску

Парафіяльныя аб'явы Літургічны каляндар Катэхеза Кантакты Відэаматэрыялы

Прэзбітэрскія пасвячэнні ў Віцебску

2 мая ў Віцебскай катэдры Езуса Міласэрнага дыяканы Антон Тышко і Андрэй Януль атрымалі прэзбітэрскае пасвячэнне з рук біскупа Алега Буткевіча. Урачыстасць сабрала шматлікае духавенства і свецкіх вернікаў, у тым ліку родных і сяброў новапрэзбітэраў.

Усіх прысутных на пачатку святой Імшы прывітаў біскуп Алег Буткевіч. Іерарх адзначыў, што сёння мы перажываем вялікую радасць і дзякуем Пану за гэты дзень, за дар паклікання кандыдатаў, якія ўвойдуць у прэзбітэрат Віцебскай дыяцэзіі.

Падчас гаміліі Яго Эксцэленцыя засяродзіў увагу на тым, чым з'яўляецца святарства. Іерарх падкрэсліў, што святарства — гэта праслаўленне Бога. Езус выбірае тых, хто будзе сведкам Яго ўваскрашэння; тых, хто будзе смела абвяшчаць Божае Слова; тых, хто будзе здзяйсняць святую Ахвяру на алтары; тых, хто стане alter Christus — «другім Хрыстом». Завяршаючы гамілію біскуп Алег пажадаў кандыдатам годна несці сваё прэзбітэрскае служэнне.

Далей Літургію працягнуў абрад пасвячэння. Уклаўшы свае рукі ў рукі біскупа, кандыдаты склалі прысягу паслухмянасці ардынарыю Віцебскай дыяцэзіі.

Па старадаўняму звычаю Касцёла — перад важнай падзеяй прасіць заступніцтва ўсіх святых — у літаніі прысутныя прасілі Божай ласкі для кандыдатаў, якія ў гэты момант у глыбокай пакоры ляжалі крыжам тварам уніз перад алтаром.

Затым, праз ускладанне рук і малітву пасвячэння, біскуп Алег удзяліў кандыдатам дар Духа Святога для выканання прэзбітэрскага абавязку. Разам з біскупам усе святары па чарзе ўсклалі рукі на кандыдатаў, каб такім чынам засведчыць іх прыняцце ў стан прэзбітэраў.

Пасля малітвы пасвячэння новапрэзбітэры апранулі на сябе святарскую стулу і арнат, што з’яўляецца знешнім знакам іх служэння, якое з гэтага часу яны будуць здзяйсняць у літургіі. Па традыцыі апранаць прэзбітэрскую вопрадку святарам дапамаглі пробашчы парафій, з якіх паходзяць кандыдаты. Антону Тышко з парафіі Святой Тройцы ў Глыбокім дапамагаў ксёндз канонік Мікалай Ціхановіч, а Андрэю Янулю з парафіі Езуса Міласэрнага ў Пагошчы — ксёндз Славамір Самковіч.

Святарскае служэнне больш поўна выяўляюць таксама іншыя знакі, якія былі ўчыненыя далей. Так намашчэнне рук алеем азначае асаблівы ўдзел прэзбітэраў у святарстве Хрыста, а ўручэнне ім хлеба і віна паказвае на абавязак кіравання цэлебрацыяй Эўхарыстыі і наследавання ўкрыжаванага Хрыста.

Завяршыў абрад пасвячэння пацалунак біскупа — гэта нібы пячатка, што пацвярджае прыняцце іх у яго служэнне. Прысутныя святары прывіталі новапасвечаных, якія з'ядналіся з імі ў супольным служэнні прэзбітэрскага стану.

Святую Імшу працягнула эўхарыстычная літургія, у якой новапрэзбітэры ў першы раз выконвалі сваё служэнне, канцэлебруючы яе з біскупам і з іншымі членамі прэзбітэрыя. На тварах маладых святароў былі радасць і хваляванне, што перапаўнялі іх сэрцы.

Завяршылася Эўхарыстыя адмысловым бласлаўленнем новапрэзбітэраў, а затым новапасвечаныя святары выказалі словы ўдзячнасці ўсім, хто прычыніўся да іх фармацыі і ўдзельнічаў у падрыхтоўцы ўрачыстасці.

Напрыканцы свята канцлер Курыі Віцебскай дыяцэзіі ксёндз канонік Віктар Місевіч зачытаў дэкрэты біскупа Алега Буткевіча аб прызначэнні новапрэзбітэраў на далейшую працу. З 20 мая 2026 года ксёндз Антон Тышко прызначаны вікарыем парафіі св.Андрэя Баболі ў Полацку і вікарыем парафіі св.Язафата Кунцэвіча ў Расонах, ксёндз Андрэй Януль — вікарыем парафіі святой Тройцы ў Глыбокім.

10 мая ў нашым касцёл адбудзецца прыміцыйная святая Імша новапрэзбітэра ксяндза Антона Тышко з удзяленнем прыміцыйнага бласлаўлення.

Жанна Закрэўская
02.05.2026