Распачынаючы святую Імшу ў паўзмроку, з запаленымі свечкамі ў руках, мы просім, каб Марыя дапамагла нам жыць паводле свайго прыкладу і добра падрыхтавацца да святаў Божага Нараджэння. Рараты — цудоўная магчымасць распачаць свой дзень з Панам Богам. Аб гэтым гаварыў у сваёй гаміліі на першай раратняй Імшы пробашч парафіі ксёндз Андрэй Кулік. Ён заахвоціў вернікаў да плёнага перажывання Адвэнту як праз рэлігійныя практыкі, так і ўчынкі міласэрнасці. Святар адзначыў: "Мы пачалі свой дзень правільна — з сустрэчы з Панам Богам, але выходзячы са святыні хочам быць з Ім і далей. Сёння мы сустрэнем розных людзей: магчыма тых, хто не ведае пра Рараты і далёкі ад Бога, або засмучаны ці раздражнёны. Пастараемся праз свае словы і ўчынкі несці ім Хрыста, дзяліцца радасцю ад чакання Нараджэння Збаўцы."
