Рараты

Парафіяльныя аб'явы Літургічны каляндар Катэхеза Кантакты Відэаматэрыялы

Рараты — падзяка Панне Марыі за яе «так»

Перажываем Адвэнт, неад'емнай часткай якога з'яўляюцца Рараты — адмысловыя святыя Імшы на ўшанаванне Найсвяцейшай Панны Марыі. Назва «Рараты» бярэ свой пачатак ад лацінскай песні «Rorate coeli desuper» («Дайце, нябёсы, росы з вышыняў»), якая спяваецца ў перыяд Адвэнту.

Традыцыйна Рараты адбываюцца перад усходам сонца. У касцёле пагашана святло, толькі гараць свечкі і раратнія ліхтарыкі, якія прыносяць з сабою людзі, асвятляючы змрок ідучы з дому ў святыню. Гэтая прыгожая сімволіка нагадвае нам пра неабходнасць збірання на працягу ўсяго Адвэнту добрых учынкаў, якія дапамогуць асвяціць змрок граху ў нашай душы, паказаць Езусу шлях да нашага сэрца.

Падчас гэтай Імшы запальваюць дадатковую свечку, якая называецца раратняй і з’яўляецца сімвалам Апякункі перадкаляднага чакання — Марыі. Найсвяцейшая Дзева з’яўляецца не толькі Апякункай чакання, але перш за ўсё яго прыкладам. Раратка — сімвал Марыі, якая сярод змроку граху нясе свету Хрыста, праўдзівае Святло.

Першыя ў гэтым годзе Рараты ў нашай парафіі адбыліся ў панядзелак 1 снежня а 7-ай гадзіне. Традыцыйная Імша распачалася пры выключаным святле. Дзеці з ліхтарамі ў руках у літургічнай працэсі прайшлі праз касцёл да алтара, каб прыняць удзел у супольнай Эўхарыстыі.

Пасля Імшы адбылася сустрэча для дзяцей і падлеткаў, якія прысутнічалі на Раратах. Пробашч парафіі ксёндз Андрэй Кулік заахвоціў прысутных да пабожнага перажывання Адвэнту, а каб час чакання нараджэння Збаўцы быў напоўнены добрымі ўчынкамі і карыснымі справамі, прапанаваў прадоўжыць традыцыю вандруючых фігурак. Дзецям неабходна прыносіць на кожную раратнюю Імшу зорачкі, з указаннем прозвішча і імя дзіцяці, а таксама добрых ўчынкаў, якія яны зрабілі пасля апошніх Раратаў. Напрыканцы Імшы святар будзе выцягваць зорачкі і вызначаць каму трапіў шчаслівы лёс — прыняць у свае дамы да наступных Раратаў фігуркі Дзіцяткі Езуса або Маці Божай.

Прымаючы фігурку Езуса ці Маці Божай у свае дамы, уся сям’я асаблівым чынам іх ушаноўвае праз супольную малітву, спяваючы адвэнтавыя песні, чытаючы Святое Пісанне. Такая форма перажывання Адвэнту дае вельмі многа магчымасцей увядзення ў сям’ю духа малітвы і адвэнтавага настрою.

У якасці дапамогі ў здзяйсненні добрых і пабожных спраў ксёндз Андрэй прапанаваў дзецям выкарыстаць Адвэнт каляндар. Заданні каляндара даступныя для выканання дзецьмі рознага узросту, аднак часам іх рэалізацыя патрабуе падтрымкі з боку бацькоў. Святар зазначыў, што калі па нейкай прычыне немагчыма выканаць заданні календара, іх можна замяніць іншымі.

Дзеці з цікавасцю пазнаёміліся з новай формай перажывання Адвэнту і з ітузіязмам яе прынялі. Заахвочваем бацькоў падтрымаць сваіх дзетак, прысвяціць ім крыху больш часу, каб дапамагчы ў іх пабожным духоўным узрастанні.

Жанна Закрэўская
01.12.2025