Ксёндз канонік Сяргей Сурыновіч завяршыў душпастырскае служэнне ў Друі

Парафіяльныя аб'явы Літургічны каляндар Катэхеза Кантакты Відэаматэрыялы

Ксёндз канонік Аляксей Асон завяршыў душпастырскае служэнне ў Новым Пагосце і Барадзінічах

4 мая парафія Найсвяцейшай Тройцы ў Новым Пагосце і парафія Святога Юзафа ў Барадзінічах развіталіся са сваім пробашчам — ксяндзом канонікам Аляксеем Асонам, які па запрашэнні Каталіцкага Касцёла ў Казахстане выязджае на місіі.

Ксёндз Алексей Асон распачаў душпастырскую дзейнасць у Новапагосцкай і Барадзінічскай парафіі ў лютым 2016 года. 12 сакавіка 2024 года, з нагоды юбілею 25-годдзя з часу заснавання Віцебскай дыяцэзіі, біскуп Алег Буткевіч надаў ксяндзу Аляксею тытул ганаровага каноніка.

На працягу дзевяці гадоў пад душпастырскай апекай святара знаходзіліся дзве вясковыя парафіі, якія на сённяшні дзень складаюцца з некалькі дзясяткаў вёсак, у якіх пражывае каля пяцісот вернікаў.

Парафіяльныя касцёлы ў Новым Пагосце і Барадзінічах і дзве капліцы: у Стэфанове і Більдзюгах былі пад атачэннем ксяндза Аляксея. Фэст у капліцы ў Стэфанове традыцыйна ладзіўся два разы на год у патранальныя святы: Нараджэнне св.Яна Хрысціцеля і св.Арханёла Міхала.

У астатніх святынях набаджэнствы праходзілі рэгулярна.

Дзякуючы ксяндзу Аляксею ў 2016 годзе ў Новым Пагосце была адноўлена традыцыя 40-гадзіннай адарацыі Найсвяцейшага Сакраманту перад парафіяльнай урачыстасцю — днём атрымання стыгматаў святым Францішкам Асізскім (17 верасня).

Значную ўвагу святар надаваў малітве за памерлых. У дзвюх парафіях знаходзіцца 28 вясковых могілак, на якіх штогод праходзілі малітоўныя набажэнствы за памерлых.

Аднак асноўным клопатам ксяндза Аляксея былі яго парафіяне. Удзяленне святых сакрамантаў, Эўхарыстыя, душпастырская навука — гэта тое, чым штодня жыў святар, каб даручаныя яму вернікі дасягнулі Божага валадарства. Перад апошняй святой Імшой у якасці пробашча ў Новым Пагосце, ксёндз Аляксей як звычайна аказваў паслугу ў канфесіянале.

У гэты дзень у святыні было шмат вернікаў. Яны прыйшлі каб падтрымаць кс. Аляксея і падзякаваць свайму пробашчу за яго святарскую дзейнасць у парафіі.

Напрыканцы Імшы дэкан Мёрскага дэканату ксёндз Андрэй Кулік выказаў словы ўдзячнасці ксяндзу Аляксею за яго душпастырскае служэнне і выразіў спадзяванне, што Божае бласлаўленне заўсёды будзе спадарожнічаць яму на новым месцы працы.

Звяртаючыся з развітальным словам, парафіяне адзначылі, што час служэння ксяндза Аляксея ў парафіі пакінуў глыбокі след і прыемныя ўспаміны ў сэрцы кожнага верніка, таму яны запэўнілі святара ў сваёй малітоўнай падтрымцы і пажадалі апекі Маці Божай і дароў Духа Святога ў яго місійнай дзейнасці.

Звяртаючыся да вернікаў ксёндз Аляксей, між іншым, адзначыў, што яны сталі для яго знакам Божай любові, бо дзякуючы іх падтрымцы і шчырасці, ён смела ішоў дарогай свайго святарскага паклікання. Сумны развітальны настрой змяніўся на ўсмешкі, калі святар запрасіў парафіянаў да сябе ў госці ў Карагандзінскую дыяцэзію, куды сам накіроўваецца на далейшую працу.

Жанна Закрэўская

04.05.2025