Пасля Эўхарыстыі адбылася працэсія на месца мучаніцтва. Моцны вецер і золкае надвор'е нібы імкнуліся перадаць настрой тых жудасных падзей, якія адбыліся амаль 80 гадоў назад. На пляцы пакутніцкай гібелі нявінных ахвяраў біскуп Алег Буткевіч адзначыў: "нікому з людзей у гэтым свеце не дазволена вырашаць адыход іншага чалавека. Маем быць паслухмянымі Божай волі. І таму сёння, чарговы раз тут, на гэтым месцы, просім Божай Міласэрнасці для тых, хто ўсё ж памыкаецца на тое, каб вырашаць: калі чалавек мае адыйсці з гэтага свету. На гэтым месцы просім аб прабачэнні для тых, хто адышоў. Адышоў можа не паяднаўшыся з Богам... Просім аб прабачэнні. Прабачэнні для памерлых. Прабачэнні для тых, хто не зважае на Божае слова. І няхай крыж, які стаіць на гэтым месцы... Крыж, які маем на сабе, будзе заўсёды знакам надзеі..."
