Сайту Kascelmery.by споўнілася пяць гадоў

Парафіяльныя аб'явы Літургічны каляндар Катэхеза Кантакты Відэаматэрыялы

Сайту Kascelmery.by споўнілася пяць гадоў

Днём нараджэння парафіяльнага сайта Kascelmery.by можна лічыць 23 ліпеня 2020 года, калі на сервер быў загружаны першы матэрыял. Парафіяльная старонка ў сеціве была створана з мэтай інфармавання вернікаў аб асноўных падзеях, якія адбываюцца ў парафіі.

Ініцыятарам стварэння парафіяльнага сайта быў пробашч парафіі ксёндз Андрэй Кулік. Менавіта дзякуючы яго ідэі, у чэрвені 2020 года распачалася работа над інфармацыйным праектам. Яна ўключала ў сябе шэраг этапаў: распрацоўку структуры сайта; яго дызайнерскае вырашэнне і тэхнічнае выкананне; размяшчэнне старонкі ў сеціве і далейшае яе падтрыманне ў актуальным стане.

Сайт Kascelmery.by створаны з дапамогай праграмы Wysiwyg Web Builder і размяшчаецца на платформе Hoster.by. Пасля запуску праекта і працы ў тэставым рэжыме, былі праведзеныя пэўныя тэхнічныя дапрацоўкі.

3 кастрычніка 2020 года з'явілася адаптыўная версія — гэта азначае, што інтэрфейс сайта распрацаваны такім чынам, што яго можна зручна праглядаць праз мабільныя прылады. Старонкі аўтаматычна падладжваюцца пад памеры смартфона ці планшэта.

Першапачаткова сайт складаўся з 23 старонак і адшукаць яго ў сеціве магчыма было толькі пры дакладным увядзенні назвы kascelmery.by. На сённяшні дзень мы маем ужо 626 старонак, якія, па запыце, з лёгкасцю адкрывае любая пошукавая сістэма.

Значную дапамогу ў пашырэнні папулярнасці сайта сярод парафіянаў аказаў Антон Анецька — адміністратар старонкі ВКонтакте “Мёры — Касцёл Унебаўзяцця Найсвяцейшай Панны Марыі”, які рэгулярна размяшчае на ёй інфармацыйныя посты са спасылкай на наш сайт.

Прасоўванню парафіяльнай старонкі ў сеціве паспрыяла таксама размяшчэнне яе артыкулаў на сайце Catholicnews.by — анлайн-версіі газеты Віцебскай дыяцэзіі “Каталіцкі Веснік”, і афіцыйным партале Каталіцкага Касцёла ў Беларусі Catholic.by. Пра падзеі ў парафіі і Мёрскім дэканаце сёння ведаюць не толькі вернікі Беларусі, але і замежжа. Дарэчы, абагуленую інфармацыю па нашых артыкулах можна знайсці нават на старонках Беларускай версіі інфармацыйнага рэсурса Vatican News у рубрыцы “Тыдзень у Беларусі — важнае”.

Каб наш сайт набраў першую тысячу праглядаў, спатрэбілася некалькі месяцаў. Сёння ж, мы маем у сярэднім 120 візітаў штодзень. Найбольшай папулярнасцю ў наведвальнікаў карыстаюцца аб'явы, навіны і рэпартажы аб падзеях у парафіі, а таксама ўрачыстасцях у Браславе, Будславе, Росіцы і іншых месцах.

Нягледзячы на пэўныя дасягненні, яшчэ шмат над чым трэба працаваць, каб наша парафіяльная старонка была цікавай і запатрабаванай. Для гэтага неабходна зваротная сувязь. Я вельмі ўдзячная ўсім за водгукі: як станоўчыя, так і крытычныя, бо яны дапамагаюць акрэсліць асноўныя накірункі дзейнасці. Прапановы па паляпшэнні работы сайта можна заўсёды выказаць асабіста або даслаць на электронную пошту kascelmery@gmail.com.

Жанна Закрэўская,
23.07.2025