На мой гонар з Божай ласкай

Парафіяльныя аб'явы Літургічны каляндар Катэхеза Кантакты Відэаматэрыялы

“На мой гонар з Божай ласкай я абяцаю з усіх сілаў служыць Богу, Касцёлу, Бацькаўшчыне…”

Гучна разносіліся па наваколлі ўпэўненыя галасы маленькіх скаўтаў з Полацка і Гродна, якія завіталі ў парафію Маці Божай Шкаплернай у Ідолта, каб пад кіраўніцтвам сваіх шэфаў, не толькі ўзрастаць духоўна, але і развіваць свае фізічныя і творчыя здольнасці праз гульню і прыгоды на прыродзе.

Набліжаючыся да часовага летніка, які ўтульна размясціўся недалёка ад святыні, адразу заўважаеш чысціню і парадак. Каля намётаў няма смецця, а ўсе рэчы размяшчаюцца на сваіх месцах, гэты факт нават крыху здзіўляе, бо тут бавяць свой час пятнаццаць хлопчыкаў ва ўзросце ад 8-мі да 12-ці гадоў. Нязвыклым здаюцца і пэўныя часовыя прыстасаванні, які зроблены без выкарыстання цвікоў. Усё проста — тут жывуць скаўты, якія з беражлівасцю і пашанай адносяцца да жывой прыроды.

Скаўтынг — гэта рух дзяцей і падлеткаў, які накіраваны на ўсебаковае духоўнае і фізічнае развіццё асобы. Каталіцкія скаўцкія адзінкі пры парафіях існую пад апекай душпастыраў і выконваюць у іх паслугу свецкіх. У 2003 годзе Апостальскі Пасад прызнаў федэрацыю скаўтаў рухам свецкіх Папскага права.

Мэта руху выражаецца пяццю накірункамі: Бог, здароўе, характар, служэнне, практыка. Уся дзейнасць падчас вандровак скаўтаў скіравана на яе рэалізацыю. Кожны дзень у летніку насычаны разнастайнымі справамі і падзеямі, аднак цэнтральнае месца ў ім займае малітва, найперш — святая Імша.

Парафіяльныя групы скаўтаў маюць сваю структуру. Па ўзросце і прызначэнні вылучаюць тры адгалінаванні, кожнае з якіх мае сваю назву і свой сімвалічны колер. Дзяўчаты і хлопцы займаюцца асобна. На адпачынак у Ідолта прыехалі хлопчыкі малодшага ўзросту. Іх называюць ваўчаняты, бо на гэтым этапе скаўцкай фармацыі яны праходзяць пэўныя выпрабаванні ў форме гульні на аснове сусветна вядомай казкі Р.Кіплінга "Маўглі". Творчыя і практычныя заданні, фізічныя практыкаванні пад кіраўніцтвам старэйшых скаўтаў-шэфаў выклікаюць незабыўныя ўражанні ў дзяцей.

Рух скаўтаў надае асаблівую важнасць цырымоніям і абрадам. Яго ўдзельнікі маюць адмысловую форму і выкарыстоўваюць багатую сімволіку. Акрамя агульных сімвалаў, як, напрыклад, двухкаляровая хусцінка, якую носяць на шыі ў выглядзе гальштука, прымяняюцца і знакі адрознення. Аднак каб мець на сваёй вопратцы пэўныя нашыўкі і сімвалы, неабход заслужыць гэтае права праз праходжанне вызначаных выпрабаванняў.

Вечарам 17 ліпеня трое маленькіх скаўтаў атрымалі берэты з нашыўкай ваўчаняці, што сведчыць аб паспяховым пераходзе на чарговую прыступку скаўцкай фармацыі. Склаўшы ўрачыстае абяцанне служыць Богу, Касцёлу і Бацькаўшчыне, хлопцы атрымалі Божае бласлаўленне з рук душпастыра скаўтаў ксяндза Алега Хмылко з Полацка, а затым прынялі берэты з адмысловай нашыўкай з рук свайго Акеллы — кіраўніка парафіяльнай групы скаўтаў.

Як адзначыў духоўны кіраўнік Душпастырства моладзі Віцебскай дыяцэзіі кс.Алег Хмылко, вандроўкі маюць вельмі вялікае значэнне ў духоўным і маральным развіцці скаўтаў. Старэйшыя скаўты-шэфы прыехалі разам са сваімі дзецьмі, каб праз супольны адпачынак паказаць ім прыгажосць навакольнага свету, які стварыў Бог, і навучыць з павагай і беражлівасцю адносіцца да прыроды, культурнай і гістарычнай спадчыны нашай Бацькаўшчыны. Гэта з'яўляецца таксама добрым прыкладам каталіцкага сямейнага выхавання.

Скаўт-шэф Алег Сенкель, які прыехаў са сваімі сынамі з Гродна, заўважыў, што знаходзячыся ў новых, нязвыклых абставінах, маленькія скаўты вучацца падтрымцы і ўзаемадапамозе, развіваюць свае практычныя навыкі, якія ім спатрэбяцца ў паўсядзённым жыцці. А яшчэ яны знаёмяцца з новымі людзьмі і знаходзяць сабе сяброў.

"Ідолтаўская зямля вельмі прыгожая і мае багатую гістарычную спадчыну. Тут жывуць сапраўды веруючыя, шчырыя і добразычлівыя людзі, таму мы вельмі ўдзячныя ксяндзу Вячаславу Адамовічу і парафіянам за іх гасцінны прыём" — падкрэсліў Алег Сенкель.

Гэта меркаванні дарослых, а што кажуць самі дзеці? Вядома, што ім вельмі спадабалася, бо кожны дзень — гэта новыя прыгоды і новыя ўражанні. Пазітыўныя эмоцыі на тварах скаўтаў-ваўчанят падцвярджэнне таго, што адпачынак прайшоў сапразды паспяхова.

Жанна Закрэўская